SUPERBALITA CEBU

1,064 milapas sa quarantine, dakpan

KAPIN sa 1,000 na ka mga tawo ang nadakpan sa Philippine National Police (PNP) ug personnel sa Prevention Restoration Order Beautification Enhancement (Probe) sa Cebu City human gipaubos ang dakbayan sa general community quarantine (GCQ).

Si Raquel Bohol Arce, pangulo sa Probe, kinsa maoy gitahasan ni Mayor Edgardo Labella sa mga dinakpan, nagkanayon nga niabot og 542 ka GCQ violators ang ilang nasikop niadtong Agusto 1.

Dominggo, Agusto 2, laing 321 ang napaubos sa disiplina ug seminar sa buhatan ni Arce sa Plaza Independencia.

Lunes, Agusto 3, nikunhod pa ang gidaghanon sanglit niabot nalang og 259 ang anaa sa ilang kustodiya hangtod alas 6 sa gabii.

Naobserbahan ni Arce nga gikan sa Agusto 1 hangtod Agusto 3, ang mga violator nag-anam og kunhod.

Siya nagtuo nga nag-anam na og tuhop ang panawagan ni Labella nga magpabilin sa balay kon walay importante nga paliton.

Sa kinatibuk-an, niabot na og 1,064 ka GCQ violators ang ilang nadakpan sulod sa tulo ka adlaw sukad gisugdan ang mas luag nga quarantine classification sa dakbayan gikan sa modified enhanced community quarantine.

Sagad sa mga violation mao ang wala pagkatakdo sa quarantine pass (QP) sa adlaw sa ilang paggawas, way QP, wa nagsul-ob og mask ug ang pagtapoktapok nga nakalapas sa social distancing policy.

“Ako pahimangno ngadto sa gustong mamasin bisan walay QP, ayaw mo og kumpyansa kay ang virus dili makita, apan makita ang Special Action Force ug Probe personnel nga dili magpanagana ninyo og dala sa Plaza Independencia para sa inyong pagdisiplina,” padayag ni Arce kinsa naila sa iyang ka-agresibo pagpatuman sa lagda sa quarantine.

Ang pangulo sa Probe nagkanayon nga kalit nidaghan ang violators gumikan sa ilang kumpyansa nga GCQ na ang Cebu City ug nagtuong mahimo na silang makagawas.

Apan si Labella kinsa niduaw kagahapon sa mga dinakpan niingon nga basta aduna pay pulong nga “quarantine” sa classification sa Cebu City, kini nagpasabot nga stay at home kun magpuyo sa balay kon walay importante nga paliton sama sa essentials samtang anaa pa ang Covid-19.

Giklaro sa mayor nga ang QP nga giisyu sa Siyudad di magamit sa laroylaroy aron lang makagawas sa ilang mga balay sanglit ang pass gamiton para pagpalit sa mga mahinungdanon.

Ang mga dinakpan diin silang tanan pulos first timer nga nakalapas sa GCQ, nisaad ngadto sa mayor nga di na mousab ug mosunod na sa minimum health protocol nga gipatuman sa awtoridad.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph