SUPERBALITA CEBU

Mag-uuma 'nanulisok' sa gigutom, gipatay

Di gyud maayong manulisok og tawo nga gigutom ug nakainom pa kay kuyaw mopatay.

Mao ni ang nahitabo sa usa ka mag-uuma nga giluba patay sa usa ka driver nga iyang gitulisok samtang nagkaon sa Lunes, alas 9 sa gabii, Agusto 3, 2020 sa bukirang lugar sa Barangay Dumalan, lungsod sa Dalaguete.

Si Junrey Ruiz Bescar, 35, minyo, mag-uuma, dead-on-arrival (DOA) sa tambalanan sa lungsod tungod sa mga samad dinunggaban.

Samtang nitahan sa kapulisan sa alas 4:50 sa kaadlawon sa Martes, Hulyo 4, ang suspek nga giilang si Jose Santa Maria Torimillano, Jr., 24, dunay kapuyo, delivery driver, nagpuyo sa lugar.

Si Police Chief Master Sergeant Maria Fay Isidro sa Dalaguete Police Station nga nahinabi sa Superbalita Cebu, nagkanayon nga si Torimillano nitambong sa birtday party sa paryente sa iyang asawa.

Nagtagay sila si Torimiliano uban sa iyang mga higala ug mga kabanay, samtang si Bescar nagtagay usab sa pikas lamesa.

Sumala pa ni Torimillano sa mga pulis samtang nagtagay sila alas 6 gabii, nagkalingaw sab pagkanta-kanta sa videoke, apan nabulabog human ang usa ka Donie gikalalis ni Bescar nga nisangko sa sukmagay, apan nauwang sila ni Torimillano.

Matod ni Torimiliano nga nisugod na unta siyag kaon sa letson kay wala siya makapanihapon tungod kay nag-una ang ilang inom, apan giduol siya ni Bescar nga iyang giingong nasuko sa iyang pag-uwang, nagsige og tulisok kaniya.

"Gutom na daw siya kaayo niadtong higayuna unya gisigihan man siyag tulisok sa biktima. Bisan unsa na lang gipanulti. Sa kalagot niya, wala na tiwasa ang letson. Iyang giluba makadaghang higayon," matod ni Isidro.

Human nahagba si Bescar sa terrace, nisibat gilayon si Torimillano ug nangayog abag sa ilang barangay official aron motahan ug mao say ni-turnover kaniya sa kapulisan.

Si Torimillano nidugang nga wa na niya maagwanta ang pagsigeg panulisok kaniya ni Bescar, gawas nga siya gigutom og maayo ug nakainom.

Dugang nakuha nga impormasyon sa kapulisan nga si Bescar naila sab nga maldito sa ilang lugar. (GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph