NIADTONG Lunes, naimbitahan ko sa akong suod kaayo nga abogado nga motambong sa virtual press conference nga ilang giorganisa aron ipahibalo nga dunay lima ka mga Mindanawons nga miduso sa ilang petisyon batok Republic Act (RA) 11479 kun Anti-Terrorism Act of 2020.
Sa maong press conference nako nasayran nga usa lider sa kaigsuonang Moro, usa ka human rights worker ug tulo ka mga journalists - ug usa ka organisasyon nga naghatag og edukasyon sa mga lumad ang nitubag sa hagit sa pagpadeklara sa maong balaod nga di haum sa Konstitusyon.
Silang tanan nagkahiusa nga batokan ang gobyerno nga moyatak sa tawhanong katungod gamit ang maong balaod.
Gibutyag ni Moro leader Haroun Alrashid Alonto Lucman sa Lanao del Sur, kinsa kanhi Vice Governor sa Autonomous Region in Muslim Mindanao (Armm) ug usa sa mga nagpetisyon, nga kung di madeklara nga unconstitutional ang balaod mosamot ang kasamok sa Mindanao.
Gipasabot ni Lucman nga misupak sila sa balaod tungod kay bisan sa mga hinabing pangkalinaw tali gobyerno ug rebulosyonaryong Moro, daghang kalapasan sa sa tawhanong katungod ang nahimo sa gobyerno nga miresulta sa ekstrimismo.
Gawas kang Lucman, laing upat ka mga indibiduwal ang misalmot sa petisyon batok sa balaod. Kini sila mao si Jay Apiag, chairperson sa Karapatan Southern Mindanao; journalists nga sila Mario Maximo "Dodong" Solis sa Radyo ni Juan, Tyrone Velez sa SunStar Davao ug Leonardo Vicente Corrales nga nakabase sa Cagayan de Oro City; ug Salugpongan Ta' Tanu Igkanogon Community Learning Center, Inc. nga una nang nakasinati og pagpanghasi sa gobyerno pinaagi sa pagpasira sa ilang tunghaan.
Alang nila, makalilisang ang maong balaod tungod kay dako ang kahigayonan nga maabuso ang katungod sa mga inosenteng mga tawo nga ilambigit sa terorismo.
Di lang sila ang nabalaka, apan lakip ang mga mga higala nakong netizens nga kritikal kaayo sa gobyerno.
Kini human ang bag-ong natudlo nga Armed Forces of the Philippines (AFP) Chief of Staff Gilbert Gapay nisaad nga iyang prayoridad ang pagpatuman sa bag-o lang napasar nga Anti-Terrorism Act.
Giingon ni Gapay nga ilang gisugyot nga iapil ang social media regulations sa Implementing Rules and Regulations sa balaud.
Siya nipasabot nga ang mga teroristang grupo nagpahimus sa social media aron paghimong radical sa mga batan-on ug pagplano sa ilang mga pagpangatake.
Sa akong tan-aw, dako ang kahigayonan nga di modaug ang mga petisyoner sa Korte Suprema tungod kay mayorya sa mga mahistrado pulos tinudlo ni Pangulong Rodrigo Duterte.
Ambot unsa kahay mahitabo sa akong mga higala nga tua sa laing nasud nga grabe ka kritikal sa gobyerno kung mapildi ang mga petisyoner?
Apan ang nakanindot niini, suma sa akong amigong abogado, dunay mga Mindanawon nga nakabaton og kaisog nga mokuwestiyon sa administrasyon.