DAVAO OCCIDENTAL -- Hugot nga gipatuman sa kapolisan ning probinsya ang "no backride policy" sa mga motorsiklo mao nga kinahanglang magpakita og identipikasyon ang mga asawa o managkapuyo aron sila maka-angkas sa motor.
Subay sa direktibang gikan sa nasyonal nga buhatan, ang Davao Occidental Police Provincial Office (Docppo) kauban ang Traffic Management Center (TMC) sa lungsod sa Malita, nagpatuman na sa Republic Act (RA) 4136 o Land Transportation Code of the Philippines.
Aduna'y mga checkpoint sa kadalanan nga gimuntar ang kapolisan aron sitahon ang mga mosupak sa maong direktiba.
Niadtong Lunes, Agosto 3, gipangunahan ni Police Executive Master Sergeant Josenilo Calinawan, ang pagpakatag sa impormasyon kalabot sa maong direktiba.
Gipaklaro sa opisyal nga gitugtan lamang ang mga manag-uyab kun sila nag-ipon na sa usa panimalay o ilawom sa common law marriage.
Apan kung aduna'y angkas, kinahanglan nga magbutang na og barrier o kaha shield nga nahisubay sa pagtugot sa Inter-agency Task Force (IATF)-Covid-19.
Nanawagan sab ang kapolisan sa mga opisyal sa barangay nga motabang pagpakatap sa impormasyon sa ilang komunidad aron wa'y madakpan.
Ang maong lakang, gipahamtang sa mga otoridad aron malikayan nga mas mokatap pa ang Covid-19.
Gumikan sa maong balaodnon, 24/7 ang monitoring sa kapolisan sa ilang quarantine checkpoint mao nga wa'y lusot ang mga masinupakon sa balaod.
Aduna sab mga nagpatrolyang pulis panahon sa kagabhion aron mapatuman ang curfew hours. (Orlando B. Dinoy)