DIGOS CITY -- Way kamatuoran nga gipailawom sa lockdown ang dakbayan sigon sa mikuyanap nga mga balita sa palibot ug sa social media.
Gawas sa giingong lockdown, mikuyanap sab nga gidili ang paggamit sa mga washable face mask ug angay nga mga surgical mask lamang ang gamiton aron di madakpan sa kapolisan apan usa kini ka fake news sanglit wa'y balaod nga nagmando niini.
Sumala ni Mayor Josef Cagas nga wa kini labot sa iyang gipaguwang direktiba nga nagklarong "no movement" lamang ang adlaw'ng Dominggo.
Nahimong epektibo sab ang unang Dominggo nga gipatuman ang maong balaod human daw nahimong "ghost town" ang palibot sanglit wa'y bisan usa ka indibidwal nga migawas niadtong adlawa.
Ilawom sa direktiba sa mayor, wa gitugtan ang mga establishemento, merkado publiko ug mga malls nga moabri matag adlaw'ng Dominggo gawas sa mga botika, ospital ug mga tindahan o sari-sari stores nga mao lang ang gitugtan nga aduna'y operasyon.
Hangtud sa Agosto 15, ipatuman ang maong polisiya apil ang liquor ban ug curfew hour gikan alas 8 sa gabii hangtud alas 5 sa sayong kabuntagon.
Gipasabot sa mayor nga kinahanglang makontrola ang posibleng pagkuyanap sa coronavirus disease o pandemya sa Covid-19.
Sa uwahing datos nga gipaguwa sa City Health Office, aduna'y 49 ka indibidwal ang pending ang test result sa Covid-19.
Sa 24 ka kumpirmadong kaso sa Covid-19, 21 na ang nakarekober ug tulo ang admitted.
Anaa sab sa 135 ang gipailawom sa strict home quarantine ug 29 ang gibutang sa city isolation unit. (Orlando B. Dinoy)