TALIWALA sa kadaghang kakulian nga nasugatan sa Philippine Basketball Assocaition (PBA) gumikan sa coronavirus disease 2019 (Covid-19), nagpabiling positibo ang panglantaw sa liga kabahin sa umaabot.
Ning bag-uhay lang, malangan na sab ang pagbalik sa training sa teams sa liga human gipaubos og balik sa Moderate Enhance Community Quarantine (MECQ) ang National Capital Region gumikan sa pagkuyanap sa Covid-19.
Nagkanayon sila si Alaska Aces coach Jeff Cariaso ug Phoenix Pulse Fuel Masters coach Louie Alas nga nagpabiling madasigon ang ilang tasgatagsa ka puwersa ug naghinamhinam na silang mokombati og balik.
“We are all anxious and excited,” matod ni Cariaso nga napatik sa usa ka artikulo sa www.pba.ph.
“Sobrang excited na lahat mag-small group workout,” matod sab ni Alas.
Sa kasamtangan, sila si Alas ug Cariaso hapit matag adlaw nagsusi sa individual training sa ilang mga magduduwa pinaagi sa online gamit ang Zoom app.
Gipasabot ni Commissioner Willie Marcial nga andam mo-adjust ang PBA ug mosunod kini sa tanang mga lagda nga ipatuman sa gobiyerno ning panahon sa pandemya.
Ang training sa PBA teams ibalik na unta sa sunod semana apan nauswag na sab kini gumikan sa pagbutang og balik sa NCR ngadto sa MECQ.
Gumikan niini, nalantawan nga mauswag sab ang pagbalik sa aktuwal nga kompetisyo sa liga. (ESL)