KON way kakulian, karon nang Septiyembre 23 ang unang away ni undefeated fighter Mark Magsayo sukad siya motapon sa kampo sa MP Promotions ni eight-time division champion ug senador Manny Pacquiao.
Hinuon, dili pa kini kompirmado ug hangtod ning atong pagsulat, padayon pang gihikay ni Sean Gibbons, ang presidente sa MP Promotions, ang mga papeles o kontrata aron na gyud mahitsas ang negusasyon.
Si Magsayo, uban sa iyang kapikas nga si Frances, miabot sa Estados Unidos niadtong Hulyo 2, ug nagpadayon sa iyang training didto sa Wild Card gym nga iya ni Freddie Roach didto sa Los Angeles.
Dala ang 20-0, 14KOs nga baraha, ang lumad nga taga Tagbilaran City posibling makigsangka sa usa ka Mexican-American Jose (Pepito) Haro nga may record nga 15-1-1, 8 KOs. Dili ka kompiyansaa kini si Haro kay aduna usab kini igong kusog nga makatugbang usab sa kalidad ni Magsayo.
Niadtong 2017, kinsa Haro mipaundang ni Daniel Franco sulod sa walo ka round sa ilang United States Boxing Association (USBA) featherweight title fight.
Sa maong away, naospital si Franco ug daling operahan aron pagkuha sa blood clots sa iyang utok.
Naluwas man tuod si Franco human sa duha ka semana nga pagka coma, apan dili na kini makaaway pa.
Apan gikan niadtong hitabo-a, hapit motulo ka tuig nga wala na usab kaaway si Haro.
Niadto lang Pebrero 29 maoy iyang unang pagsaka og balik sa ring ug iyang gipildi si Genaro Rodriguez sa six-round fight didto sa Tijuana.
Si Magsayo, sa iyang bahin, katapusang nakaaway sa a niaging tuig, sumad karong buwana didto mismo sa iyang yutang natawhan sa Tagbilaran.
Iyang gikakontra niadtong higayona ang beteranong Thailander ug kanhi world champion nga si Panya Uthok.
Kini si Panya Uthok mao kini si Pungluang Sor Singyu Onesong, ang nagpildi sa kanhi stablemate ni Magsayo nga si AJ “Bazooka” Banal sa ilang WBO bantamweight world title fight niadtong Oktubre 20, 2012 didto sa Mall of Asia sa Kaulohan pinaagi sa 9th round knockout.
Yano man tuod nga nabuntog ni Magsayo si Uthok pinaagi kini sa unanimous decision apan atong naobserbahan mao nausab ang estelo sa giilang knockout artist niadtong higayona.
Nawala ang iyang kaagresibo nga iyang ma-knockougt si Uthok, sama sa iyang mga nangaging away.
Diay ang tuyo niya mao ra gyud ang pagdaog, kay mao may plano sa ilang kampo. Daghan sa fans ni Magsayo ang nagtuo ug naghuwat nga iyang ipakita ang iyang kabangis ibabaw sa ring, apan bisan pa man og mahimo na niya nga ma knockout si Uthok wa kini buhata.
Daghan na hinuon ang gilaay sa maong away kay wa man moabot ang ilang gipaabot nga mao ang pagka agresibo sa ilang idolo.
Human sa away, sa akong interview, si Magsayo mipasabot nga dili siya gusto nga mahitabo ngadto kaniya ang nahitabo ni Banal.
Gusto ni Banal nga ma-knockout si Uthok apan naluya na lang kini og sinukmag wa gyud katumba hangtod nga siya na hinuon ang naunhan.
Mao nga bisan og maingon nga pabor na siya ug mahimo na kini niyang tumbahon, wa gyud siya mosugal nga mosulod sa ilang away kay nahadlok kini nga mataghapan.
Matod niya nga usa usab kini sa iyang adjustment nga gihimo karon nga daw og usa na siya ka matured fighter.
Dili sa tanang higayon moataki. Pero, ambot og mao ba gihapon kini ang iyang buhaton nga karon ubos na siya sa pagdumala ni Roach, usa sa giilang boxing trainer.
Sa boxing, kon moabot ang kahigayonan nga kon sa imong tan-aw groggy na ang kontra dili gyud nimo usikan ang panahon. Di na ka maghunahuna og kahadlok. Goodluck, Mark. jun.migallen22@gmail.com