ANG Cebu City Health Department (CHD) niseguro nga di kuwang testing kits, nga alang sa swab ug rapid diagnostic test.
Si CHD officer-in-charge Jeffrey Ibones niingon nga ang health office duna pay mga 38,000 RDT testing kits, samtang ang test kits alang sa swabbing hulipan matag higayon nga ang CHD staff mo-submit sa swab samples sa Department of Health (DOH) 7 Cebu TB Reference Laboratory for Covid-19 Testing Facility ug sa Vicente Sotto Memorial Medical Center (VSMMC) sub-national laboratory.
“Once naa mi ihatod sa Sotto or CTBRL, ang among gipangswab, hatagan mi’g replenish ana,” matod ni Ibones. Lahi kaniadto, di na kinahanglan ang usa ka pasyente nga i-swab test pag-usab karon kon mo-qualify isip clinically recovered busa mas daginot na ang kits.
Matod ni Ibones nga ma-apply kini sa mga pasyente nga nagpuyo sa barangay isolation centers nga asymptomatic. Mag-agad kining tanan sa assessment sa doktor.
Sa rapid diagnostic test (RDT), si Ibones niingon nga igo na kini nga gamiton alang sa mass testing nga ipahigayon sa Carbon Public Market.
Sa sayo, ang City Hall niingon nga ang swab test gamiton sa mga manindahay sa Carbon, apan si Cebu City Councilor Joel Garganera, ang deputy chief implementer sa Emergency Operations Center (EOC) Cebu City, niklaro nga ang RDT maoy gamiton, tungod sa gidaghanon sa mga manindahay sa merkado.
Si Garganera niingon nga busy karon ang Siyudad, labina nga gihingusgan ang contact tracing.
GIHULIPAN
Si Ibones maoy nipuli kang kanhi City Health Officer Daisy Villa sukad niadtong Hulyo 30, 2020. Si Cebu City Mayor Edgardo Labella niingon nga kinahanglan dunay pagbaylo sa mga pangu sa mga departamento kay sagad kanila, hulipan kon moabot nag usa ka tuig sa iyang buhatan.
Si Villa, sa iyang text message sa Sunstar, niingon nga siya gidestino na sa New Normal Oasis for Adaptation and a Home (Noah).
Si Labella niingon nga kinahanglan dunay usa nga motutok pag-manage sa Covid-19 patients sa NOAH ug iyang nakita si Villa nga haum sa posisyon. Si Ibones, kinsa usa ka doktor, nangu sa Department of Social Welfare and Services (DSWS). (JJL)