MGA sapa sa Dakbayan sa Sugbo palimpyohan sa Department of Environment and Natural Resources (DENR).
Gipahibawo ni DENR Secretary Roy Cimatu nga limpyohan sa iyang ahensiya inabagan sa local government unit (LGU) ang mga sapa sa dakbayan sa Sugbo.
Ang pangulo sa DENR kinsa maoy nakalimpyo sa Manila Bay ug Pasig River nimando na DENR-7 sa paghimo og plano aron kasugdan ang paghawan ug paghakot sa toneladang basura ang lima ka dagkong sapa sa dakbayan.
“Lilinisin namin ang mga river dito sa Cebu City, hindi lang yong Mahiga Creek. I gave directives already to clean all the rivers including the river galing doon sa taas. Lilinisin rin natin yan para maipikita sa mga tao na we are really very interested in the environmental issues for their protection,” dason ni Cimatu.
Ang maong kasayuran gibutyag ni Cimatu, overseer sa Inter Agency Task Force (IATF) Visayas, human nipadayag sa kabalaka ang mga residente sa Barangay Sapangdaku diin itukod ang public cemetery sa dakbayan.
Iyang gipasabot nga dili makaapekto sa tinubdan sa tubig sa Sapangdaku ang tukoron nga sam-ang.
Siya nipahinumdum nga likayan ang pagputol og mga punoan sa kahoy ilabi na niadtong fruit bearing trees atol sa katukoran.
Ang maong sementeryo maoy giandam sa Cebu City nga maoy lubngan sa mga namatay sa Covid-19 sanglit puno na ang menteryo sa ubang dapit sa siyudad. (PAC)