KAY wala may libre nga internet diri sa ato, kon magsugod na ang klase, magpasabot nga mokuha og internet connection ang kada estudyante nga moeskuyla og online class.
Pwede siya mokuha og mahalon nga plan.
Pwede pod siya mokuha og kanang baratohon lang nga load-load pero dunay limit ang paggamit.
Unsay mahitabo kon mag-klase na?
* * *
Mahal man ang plan, kadto na lang baratohon nga load-load nga mobile data nga pila ra ka minutos ang paggamit maoy gamiton.
Kon maayo mosulti ang maestro o maestro, very good.
Kon dili maayo mosulti, labi na og dili nindot ang tingog, dali ra pul-an ang mga estudyante nga maminaw sa lecture sa computer o cellphone.
Tin-aw ang salida kon mahalon ang cellphone pero lubog ang salida kon baratohon ang cellphone.
Kon daghan ang estudyante sa maong lugar, hayan hinay ang signal sa internet og way makita ang estudyante, igo lang siya makadungog pero walay salida.
Sa pagsugod pa, mahimo nga maminaw gyod ang estudyante apan sa kadugayan na, mahimong pul-an na ang estudyante og magkalingaw na lang og katulog.
Tungod kay kapoy sab ang maestro o maestra kay siya ray nag-istorya sa iyang computer o cellphone, dili sab siya makabantay kon anaa pa ba nag-online ang tanan niyang mga estudyante.
Ang anaa sa iyang hunahuna nga humanon lang niya ang maong leksiyon sa maong oras para laing leksiyon na sab ang iyang atimanon.
Ang mahitabo, dili niya mahibaw-an kon padayon pa ba nag-online ang tanan niyang mga estudyante.
Kon tawgon niya ang usa ka estudyante, sayon ra sa estudyante pag-ingon nga dili klaro ang signal aron lang dili kini makatubag.
Buot ipasabot, mosamot kalisod ang trabaho sa mga maestro ug maestro kon online classes na ang pagahimoon.
Lisod sab parte sa mga estudyante kay magsigi man sila og gasto para load aron lang maka-connect sa internet.
Ang resulta – morag moryo-moryo lang ang eskuyla og sama sa nagdula lang ang maestro/maestro ug mga estudyante sa ilang leksiyon.
* * *
Dunay gobernador nga wala malipay sa nahitabo sa iyang probinsiya.
Daghan og ayuda ang gihatag sa iyang probinsiya. Kasagaran niini, ayuda sa mga mag-uuma.
Apan dili malipayon ang gobernador.
Ngano man?
Kay dili man siya mismo ang nanghatag sa maong mga proyekto. Wala siyay ika-panghambog. Wala siyay ikatugbang. Igo lang siya modayeg sa ayuda sa kagamhanan apan siya mismo, walay ikahatag. O kon duna man, gamay lang kaayo ang iyang mahatag.
Mogawas nga igo lang siya sa estorya apan walay ikahatag.
Unsay gusto niya mahitabo?
Gusto niya maundang na kini kay mas maayo gyod kon siya mismo ang mohatag sa ayuda. Bahala na og maundang ang mga ayuda sa kagamhanan.
Husto ba kini?