SUPERBALITA CEBU

Editoryal: Disiplina, higpit nga polisiya

Editorial Cartoon by Ariel Itumay

SI SECRETARY Roy Cimatu sa Department of Environment and Natural Reaources (DENR) nipahibalo nga limpyohan ang mga sapa sa dakbayan sa Sugbo ubos sa papangulo sa iyang departamento inabagan sa local government lakip sa mga nagpakabanang pribado nga grupo o pahugpongan ug indibiduwal.

Isip pangulo sa DENR, naila siya sa iyang pagpangulo sa palimpyo sa Manila Bay ug Pasig River sa kaulohan nga napuno sa daghang basura ug ang mapangasong pagpasira sa isla sa Boracay alang sa pagpanglimpiyo labina sa kadagatan, lakip sa pagsusi sa saktong pagdumala sa basura o hugaw.

Ang naasoy nga kalamposan nakahatag og maayong imahen ni Cimatu. Seguro, nakadayeg si Presidente Rodrigo Duterte ug gitudlo usab siya nga pangulo karon sa Inter Agency Task Force (IATF) sa Kabisay-an. Si Cimatu niingon nga limpyohan nila ang sapa aron makita sa mga tawo nga seryuso ang gobiyerno pagprotektar sa kianiyahan. Nindot ang plano niya apan makalahutay kaha kon walay displina ang katawhan ug way makanunayong hipit nga pagpatuman sa polisiya?

Usa sa iyang unang gitumbok mao Mahiga Creek nga utlanan sa dakbayan sa Sugbo ug Mandaue. Makadaghan na kini gipaubos sa paglimpiyo pinaagi sa nagkalainlaing grupo ug hiniusang puwersa sa kagamhanan sa duha ka mga dakbayan. Apan dunay higayon hugaw gihapon kini labina kon magbaha.

Dunay beautification project sa habig sa dakbayan sa Sugbo sa dapit apan gisugdan lang dayon gibiyaan.

Mas magkomplikado ang ubang kasapaan. Daghang nimuyo sa daplin nga hinungdan sa kahugaw nga nagdala og problema sa pag-agos sa tubig labi na sa ting-uwan, dakong lunop.

Ang pagpahawa sa squatters sa dapit ug pagpatuman sa easement zone o dili pagpapuyo pipila ka metro gikan sa kilid sa sapa nag-unang sulbad. Gawas pa, ang pagpuyo sa kilid o pagtukod og balay mismo diha sa sapa dakong risgo sa kinabuhi. Displina ang gugokan ning tanan diha sa habig sa kagamhanan ug mga residente.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph