Hulagway tampo sa Borbon Police
Hulagway tampo sa Borbon Police

Ex-Army reservist nag-checkpoint, gidakop

KANHI Philippine Army reservist nga nag-checkpoint ug nanakop sa mga nagmotorsiklong way barrier gidakop sa kapulisan mga alas 9:30 sa buntag sa Martes, Agusto 4, 2020, sa Barangay Clavera, lungsod sa Borbon, amihanang Sugbo.

Kasong usurpation of official function ug illegal nga paghupot og armas ang atubangon ni kanhi reservist Master Sergeant Relito Cabillan Aliño, 50, minyo, taga Barangay Canagahan, lungsod sa San Remegio.

Matod ni Police Lieutenant Samuel Negro, hepe sa Borbon Police Station, nga si Jun Ralph Flores, barangay kapitan sa Lugo, nangayog abag kanila kay nangahadlok ang mga lumolupyo kay dunay armadong lalake nga nag-checkpoint nga naka full military uniform.

Pag-abot sa kapulisan sa dapit, si Aliño nipasabot kanila nga igo ra siyang miabag sa kagamhanan sa pagpatuman sa balaud pinaagi sa pagsita sa mga nagmotorsiklo nga way barrier ang gisakyan.

Nakuha gikan kang Aliño ang usa ka magazine sa M16 Armalite rifle nga dunay unom ka mga bala, usa ka 9mm nga Black Widow revolver ug usa ka XRM motorcycle.

Gikompirmar ni Lieutenant Colonel Antonio Esmero, battalion commander sa 7th Army Reserve Command nga nakabase sa Sudlon, Lahug, Cebu City, nga niadto pang 2017 gitangtang sa ilang rooster si Aliño.

Si Aliño pasakaan og mga kasong kalapasan sa Article 177 kun Usurpation of Authority or official functions sa Revised Penal Code ug kalapasan sa Republic Act 10591 kun Comprehensive Firearms and Ammunition Regulation Act.

Si Aliño gitanggong karon sa Borbon Police Station. (GPL)

Related Stories

No stories found.
SunStar Publishing Inc.
www.sunstar.com.ph