KON ikaw coronavirus disease (Covid-19) survivor ug nagplanong mobaligya sa imong blood plasma, ayaw na lang kini buhata.
Si Police Brigadier General Albert Ignatius Ferro, hepe sa Police Regional Office 7, nimando sa tanang chief of police sa Central Visayas sa pag-imbestigar sa mikatap nga impormasyon nga adunay mga naka-recover sa Covid-19 ang namaligya og blood plasma. Kon mamatud-an nga tinuod, iyang ipasikop ang masakpan.
Naabot na sa buhatan sa PRO 7 ang impormasyon nga nagkadaghan karon ang namaligya og blood plasma gikan sa mga tawo nga naayo na sa Covid-19 inay nga ila kining idonar ngadto sa mga pasyente. Matod ni Ferro, illegal kini kay nahasupak sa balaod sa nasud tungod kay sama ra nga namaligya sila og internal organs.
Tungod niini, iyang gimandoan ang tanang station commanders sa dakbayan sa Sugbo nga moimbestigar uban ang Department of Health aron masumpo ang maong illegal nga kalihukan.
Kon mamatud-an nga namaligya ang usa ka kanhi Covid positive, dakpon kini lakip na ang nagkuha sa blood plasma nga medical practitioner ug pasakaan og kaso ngadto sa korte.
“I ask every unit commander to find out whether in their particular AOR (area of responsibility) there’s such thing as plasma for sale so that we will be able to arrest these people, file criminal cases against them,” matod ni Ferro. (AYB)