BISAN og wa pa hingpit masulbad ang problema sa coronavirus disease 2019 (Covid-19), laing katalagman na sab matud pa ang giingong moabot nga mao ang makusog nga linog nga mokalas og daghang kinabuhi.
Ang numerologist ug Tarot Diviner nga si Professor Morey Catapang, 85, nabase sa Kidapawan City, subling nahinabi sa SunStar Superbalita ug siya nagkanayon nga iyang nakita nga dunay makusog nga linog nga moabot.
Sukwahi sa una niyang gibutyag sa milabay'ng bulan nga way kamatuoran ang na post sa Facebook kabahin sa makusog nga linog nga masinati sanglit naunang gibutyag ni Catapang nga human mahanaw o masulbad ang problema sa Covid-19 sa Septyembre ning kasamtangang tuig, mahibalik sa normal ang tanan ug way katalagman nga masinatian ang katawhan.
Ang maong pamahayag gitin-aw ni Catapang nga human mahanaw ang Covid-19 sa maong bulan, dunay makusog nga linog ang mahitabo sa mosunod nga mga tuig una mokanaug sa katungdanan isip presidente sa Pilipinas si Rodrigo Duterte.
Matud pa niya nga ang linog dunay gikusgon nga intensity 10 ug daghang gambalay mahugno ug daghang kinabuhi makalas ug mahitabo.
Giawhag ni Catapang ang katawhan nga mag-ampo sanglit, ang Diyos Amahan lamang ang makatabang aron malikay sa posibleng katalagman.