TACURONG CITY -- Gikakurat di lang sa nag-alaga apan sa mga silingan ug katawhan sa Probinsiya sa Sultan Kudarat sa gihimugso nga kabaw nga nagbaton lang og duha ka tiil alas 10 sa buntag niadtong Martes, Agosto 4, 2020.
Matud ni Marilyn Lacasandili nga taga Barangay Bilumen, Lambayong sa nahisgutang probinsiya nga gikatingala nila nga ang ilang binuhing kabaw nanganak nga duha lang ang tiil.
Ang kabaw gipanganlan sa pamilyang Lacasandili og Primo diin ila pa kining gimoskitan sulod sa ilang balay.
Gumikan dili makalakaw ang bag-o nga anak sa kabaw kay ang duha ka tiil naa lang sa pangunahan niini nga lawas, maglisud kini og totoy sa iyang inahan.
Tungod niini, nakadesisyon ang pamilyang Lacasandili nga ila na lang patutuyon ang bag-ong anak nga kabaw gamit ang bibiron o feeding bottle.
Gipamahayag ni Koronadal City Veterinarian Dr. Charlemagne Calo nga ang pagpanganak sa maong kondisyon sa hayop gitawag og "congenital defect" nga posibleng mugna sa nutritional, environmental, hereditary o chemical nga miresulta sa abnormalidad nga pagkahimugso.
Gikompirma sab ni Calo nga ang kondisyon sa bag-ong anak nga kabaw makamugna og problema sa iyang panglawas kay di normal ang "function" sa iyang upat ka mga compartment sa digestive system.