DUHA o tulo ka mga away lang ang gikinahanglan sa Bol-anong boksidor ug kanhi Cebu-based Mark Magsayo ug makakuha na kini’g oportunidad nga makapanuktok alang sa world title.
Mao kini ang panglantaw ni MP Promotions president Sean Gibbons kabahin sa sa iyang bag-ong batos.
Si Magsayo mosagubang sa labing una niyang away isip sakop sa MP Promotions sa Premier Boxing Champions karong Septiyembre 23, 2020.
“Two or three fights and Mark (Magsayo) is in a world title fight,” matod ni Gibbons sa taho sa RingTV.com.
Adunay dakong poruhan nga mahitabo kini gumikan kay ang 25-anyos nga si Magsayo adunay impresibo nga rekord niini nga 20-0, 15 KOs ug nasulod sab kini sa top 15 featherweights sa upat ka mayorihiyang sanctioning bodies.
Siya maoy No. 4 sa International Boxing Federation (IBF), No. 5 sa World Boxing Council (WBC), No. 13 sa World Boxing Association (WBA) ug No. 15 sa World Boxing Organization (WBO).
Gumikan sa mga kakulian nga iyang nasugatan sa wala pa siya nasulod sa MP Promotions, si Magsayo taodtaod na sab nga wala nakaaway.
Niadto pang Agusto, 2019 ang katapusang away ni Magsayo diin midaog siya pinaagi sa unanimous decision batok kang Thai Pungluang Sor Singyu.
Miabot si Magsayo sa Estados Unidos sa miaging buwan ug nag-training kauban si Freddie Roach sa Wild Crd Gym sa Hollywood sa wala pa gipasirhan ang gyms sa Los Angeles tungod sa padayong pagtaas sa kaso sa coronavirus disease 2019 (Covid-19).
Sa pila ka semanang training ni Magsayo sa Wild Card Gym, iyang naka-sparring ang mas dagko nga welterweight prospects sama nila Viktor Postol ug Aram Amirkhanyan.
Iya pud nakontra si junior featherweight nga si Azat Hovhannisyan.
Sa pagkakaron si Magsayo nag-outdoor training kauban si conditioning coach Justin Fortune sa University of California Los Angeles (UCLA) track ug pampublikong luna sama sa Pan Pacific Parkg and Griffith Park.
Ang Pan Pacific Park ug Griffith Park mao ang mga sikat nga running locations sa Los Angeles ug mao pud ang paborito nga lokasyon ni eight-division champion Manny Pacquiao kon siya mag-roadwork.