GIPAMULTA sa City Traffic Management System (CTMS) sa dakbayan sa Lapu-Lapu ang duha nila ka mga sakop nga nakuhaan ug hulagway sa usa ka netizen nga nag-angkasay nga walay barrier ang motorsiklo.
Kini ang gikompirmar ni Mario Napule, pangulo sa CTMS dihang nahinabi sa Superbalita Cebu.
Matod ni Napule, iyang nailhan ang iyang duha ka mga sakop human nga iyang na-trace sa plate number sa motorsiklo nga naklaro sa hulagway nga mikatap sa social media.
Sila mao si Joshue Necesario samtang ang backrider mao si Rolando Inot.
Ang motorsiklo nga gigamit sa duha ka personnel giingong iya sa CTMS.
Nahitabo kini niadtong Biyernes, Hulyo 31, sa Brgy. Mactan.
Giingong gikan ang duha sa ilang gipahigayong One Time Big Time Operation kalabot sa backride sa motorsiklo nga walay mga barrier.
Balot P500 ang citation ticket nga nadawat ni Necesario.
“Akong giimbestigar niangkon gyud silang duha mao to nagtunga sila sa penalty na lang,” matod ni Napule. (GCM)