SUPERBALITA CEBU

106 ka LSI sa Cebu City natabangan

ANG Cebu City Government nakahatag na og financial assistance ngadto sa 106 ka mga locally stranded individuals (LSI) para aduna silay ikaplete pauli sa ilang tagsatagsa ka dapit human matanggong sa dakbayan sulod sa upat ka buwan gumikan sa pandemic sa Covid-19.

Si Jonil Matuguina, operation head sa Department of Social Welfare and Services (DSWS), nagkanayon nga sagad sa nipahimulos sa ayuda gikan sa siyudad nagagikan sa lalawigan sa Sugbo ang uban paingon sa Bohol ug Negros island ug nihit pa ang paingon sa Mindanao.

Matod ni Matuguina, modagsa pa unya ang gidaghanon sa mga LSI sa mosunod nga mga adlaw sanglit hangtod pa sa Agusto 31 ang ilang pagpanghatag og ayuda ug niadto ra silang Agusto 3 nagsugod og apud-apod.

Matod ni Matuguina, dili 100 porsiyento sa iduso nga mga pangalan gikan sa buhatan ni City Councilor Raymond Alvin Garcia sanglit ang uban nakabiya na ug ang uban magpa-reschedule gumikan sa lainlaing rason.

Gipadayag ni Matuguina nga kadtong mga LSI nga walay internet connection, mahimo silang mobisita sa barangay hall diin sila nga barangay nagpuyo aron matabangan sa pag-send sa ilang mga requirement aron tabangan sila sa mga barangay secretary.

Ang mga LSI nga gustong mo-avail sa programa nga gipasiugdahan ni Mayor Edgardo Labella, mopadala lang sa ilang valid ID, travel authority gikan sa PNP ug barangay certification nga nagpamatuod nga sila LSI ngadto sa project.spgarcia@gmail.com ug kinahanglan kini pulos naka PDF file.

Ang buhatan na ni Garcia maoy mopadala sa mga pangalan ngadto sa buhatan ni Matuguina ug aduna silay mga social worker nga maoy mo-interview sa mga LSI sa dili pa sila tagaan sa financial assistance.

Ang mga LSI nga natanggong sa Cebu City ug mopauli paingon sa lalawigan sa Sugbo makadawat og P1,000-P1,500, ang paingon sa mga lalawigan sa Visayas makadawat og P1,500-P3,000 ug P3,000-P5,000 ang mopaingon sa Mindanao ug Luzon.

Ang Cebu City adunay gibanabana nga 18,000 ka mga LSI apan gipasabot ni Matuguina nga dili tanan kanila ang mo-qualify gumikan sa lainlaing rason sama pananglit sa kapakyas pagdala og ID nga nagpamatuod nga nagpuyo sila sa lugar gawas sa Sugbo ug ang uban dili na maghuwat nga mokubra sa ayuda sanglit ang mahinungdanon para kanila mao nga makauli sila sa ilang lugar nga gigikanan.

MILARGA

Mokabat sa kapin 1,500 na ka mga tawo ang natala sa Cebu Port Authority (CPA) nga nilarga ug niabot sa Sugbo sukad gipaubos sa general community quarantine (GCQ) ang Sugbo.

Base sa datus sa CPA, gikan sa Agusto 1 hangtod Agusto 5, niabot na sa 379 ka mga pasahero ang niabot sa Sugbo gikan sa nagkadaiyang parte sa nasod.

Agusto 1, 53 ka pasahero ang nakauli na sa Sugbo gikan sa Cagayan, Surigao, Tubigon ug Tagbilaran.

Gisundan kini sa 65 ka pasahero nga gikan sa Masbate, Nasipit, Dumaguete, Surigao, Tubigon, ug Tagbilaran.

Samtang 115 ka mga pasahero ang nangabot sa Sugbo niadtong Agusto 3, gikan sa Iligan, Hilongos, Ormoc, Cagayan, Manila, Iloilo, Ozamis, Surigao, Palompon, Plaridel, Tubigon, Tagbilaran, ug Talibon.

Agusto 4, nakauli ang 118 ka pasahero gikan sa CDO, Ormoc, Surigao, Iloilo, Ozamis, Nasipit, Maasin, Dumaguete, Tagbilaran, ug Tubigon.

Samtang anaa sa 28 ka tawo ang natala gahapon, Agusto 5, gikan sa Calbagyog ug Tubigon.

Mas daghan usab ang pasahero nga migawas sa Sugbo diin nakatala ang CPA og 1,209 ka pasahero.

Agusto 1, 56 ka pasahero ang nilarga gikan sa Sugbo paingon sa Dumaguete, Dapitan ug Ozamis.

Agusto 2, dunay 76 ka pasahero ang niuli paingon sa Palompon, Dumaguete, Ozamis, Tubigon ug Tagbilaran.

Agusto 3, natala ang 587 ka pasahero nga nipaingon sa Manila, Hilongos, Ormoc, Cagayan, Ozamis, Maasin, Surigao, Dumaguete, Calbayog, Tagbilaran, Tubigon ug Talibon.

Agusto 4, anaa usab sa 490 ka pasahero ang milarga paingon sa Hilongos, Dipolog, Surigao, Masbate, CDO, Ozamis, Iloilo, Larena ug Tubigon.

Agusto 5, 112 ka pasahero ang nilarga paingon sa Surigao ug Tubigon.

Gipahibawo usab ni CPA General Manager Leonilo Miole nga sa Agusto 15 pa epektibo ang no face shield, no ride policy sa mga pantalan sa Sugbo. (PAC, HBL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph