USA ka Sugboanong magbabalaud nag-awhag sa mga awtoridad sa pagsusi sa mga bodega ug uban pang storage facilities sa Sugbo diiin posibleng gitipigan ang peligro nga mga butang.
Si Kongresista Pablo John Garcia sa 3rd district sa Cebu niawhag sa mga opisyal sa pantalan ug Customs sa pagsusi sa peligrusong mga butang sa mga bodega human sa pag-ulbo nga nahitabo sa siyudad sa Beirut, Lebanon, diin duha ka mga Pinoy ang nangamatay ug laing walo ang nangaangol.
Sa usa ka pamahayag, si Garcia niingon nga ang mga butang nga gitipigan sa storage facilities sa mga pantalan, diin daghang cargo ug container vans ang gipamutang sud sa daghang mga buwan ug katuigan, angay nga kabalak-an.
Kon way tukmang imbentaryo ug pag-ila ning mao nga mga butang, kini naghatag og kakuyaw sa Sugbo nga agianan sa mga pasahero ug cargo nga bag-o lang gibuksan.
“This tragedy from across the world could be an eye-opener. Our hearts go out to the victims and their families. Their deaths and injuries should at least not be in vain,” matod ni Garcia sa usa ka pamahayag.
Samtang, ang Department of Foreign Affairs (DFA) niingon nga duha ka mga Pinoy ang nangamatay ug walo ang nangaangol sa duha ka mga pagbuto nga nitay-og sa Port of Beirut sa Lebanon sa Martes sa gabii, Agusto 4, 2020.
Sa usa ka pamahayag sa Miyerkules, Agusto 5, ang DFA pasiunang niingon nga unom ang mga Pinoy, apan ni-update sa mao nga gidaghanon ngadto sa walo pipila ka mga oras ang nakalabay.
Sa walo, usa ang kritikal apan naa sa stable nga kahimtang. Ang duha naa sa recovery sa Philippine Embassy Chancery human matambali sa tambalanan. Ang uban nakaangkon lang og gamay nga mga samad.
Ang Philippine Embassy sa Beirut, nga nikompirmar sa mga casualty, niingon nga ang duha ka mga Pinoy nga naa sa Chancery apil sa 13 ka mga Filipino seafarer kinsang barko nagdunggo mga 400 metros gikan sa dapit nga gibuthan.
Laing 11 ka Pinoy nga seafarer missing, apan sa uwahing kalamboan sa Miyerkules,ang 10 napalgang luwas. Laing Pinoy nga service worker gitaho usab nga missing, nga nidala sa gidaghanon sa Pinoy nga missing ngadto sa duha. (SunStar Philippines, PR)