WALAY trabaho lukop probinsya sa Sugbo karon, Huwebes, Agusto 6, 2020 lakip na ang mga dakbayan sa Sugbo, Lapu-Lapu ug Mandaue tungod sa kasaulogan sa pagkatukod sa Lalawigan sa Sugbo.
Kini subay sa Republic Act 8952 sa 2000 nga giamendahan ni kanhi kongresista Pablo Garcia ubos sa Republic Act No. 7698 nga naghimong non-working public holiday lukop probinsya apil ang highly urbanized ug component cities.
“August 6 a special non-working public holiday for the entire Province of Cebu including its highly urbanized cities Cebu and Mandaue, and component cities Lapu-Lapu, Danao and Toledo,” matod sa mao nga balaud.
Karong adlawa mao ang ika-451 nga kasumaran sa pagkatukod sa Probinsya sa Sugbo.
Nalakip sa mga kalihukan nga ipahigayon mao ang hiniusa nga flag ceremony nga tambungan ni Gobernador Gwendolyn Garcia, Bise Gobernador Hilario Davide III, Provincial Board members ug department heads sa Kapitolyo.
Gitahasan ang mga empleyado sa Kapitolyo nga maoy mo-isa sa mga bandera atol sa flag ceremony.
May mensahe usab nga ipadangat ang gobernador alang sa mga Sugboanon nga naapektohan sa krisis gumikan sa coronavirus disease.
Kon kaniadto moabot og usa ka buwan ang pagpangandam sa Kapitolyo alang a kasaulogan, karon mipahibaw si Garcia nga way engrande nga selebrasyon.
Tungod sa pandemya, wa na gidapit ang mga mayor sa pisikal nga pagtambong sa Kapitolyo apan ipaagi na lang online.
Sundan usab kini sa usa ka misa sa pagpasalamat nga ipahigayon sa Capitol social hall ug ang hiniusang salo-salo sa opisina sa gobernador.
Si Garcia bag-o lang nibukas sa pipila ka mga tourist attraction sa Lalawigan sa Sugbo aron pagpabangon sa turismo nga naapektuhan og maayo sa Covid 19.
Unang gibuksan ni Garcia ang whale shark watching sa lungsod sa Oslob, amihang Sugbo, diving sa Moalboal ug dayon ang all terrain vehicle (ATV) adventure sa lungsod sa Barili.
Si Garcia niingon nga di siya ganahan mohatag og State of the Province Address (SOPA) kay nasayod na ang tanan sa kalisdanan nga giatubang karon sa Sugbo.