BISAN kon wa pay klaro kanus-a mahingpit ang bakuna batok sa coronavirus disease (Covid-19), ang Cebu City Government nisaad nang mopalit og bakuna aron duna nay panagang ang libuan ka mga Sugboanon sa dakbayan sa Sugbo.
Si Mayor Edgardo Labella nipahibawo nga mogahin og pundo ang Dakbayan sa higayon nga aduna nay bakuna nga aprobado sa Food and Drugs Administration (FDA).
“Ang priority concern sa atong administration karon mao ang maayong panglawas ug kinabuhi sa atong katawhan. Duna na may official pronouncement si Presidente Rodrigo Duterte nga by December naa nay vaccine ug ma-officially declared sa FDA nga makaayo ug makapanalipod sa sakit nga Covid-19. Unya suma sa atong nahibaw-an, limitado man ang gidaghanon sa mabakunahan,” padayag ni Labella sa interview sa Superbalita Cebu.
Si Labella wa pa mobutyag kon pila ang target sa City Government nga mabakunahan.
Apan iyang gibutyag nga subay sa anunsyo ni Duterte, moabot lang og 20 milyones ka mga tawo ang makabenepisyo gikan sa kapin 100 milyones nga populasyon sa tibuok nasod gumikan sa kakuwang sa pundo sa national government.
Ang Cebu City adunay kapin o kulang one million ka mga lumolupyo ug kon basehan ang 20 porsyento nga sumada sa National Government nga maoy mabakonahan, anaa ra sa 200,000 ka tawo ang makabenepisyo, hinungdan nga gusto sa mayor magahinan og pundo para madugangan ang gidaghanon sa mga mabakonahan.
Ang mayor niingon nga nangita na karon og budget ang Local Finance Committee, city health officials ug mga sakop sa Sangguniang Panlungsod para sa pag-realign sa mga pundo aron maoy ipalit og bakuna.
Si Labella nidugang nga maggahin usab sila og pundo para sa annual budget sunod tuig para sa ipalit sa bakuna kon dili paigo ang makuha nga budget gikan sa makuha pundo gikan sa mga realigned nga proyekto.
“Maningkamot kita kay dili man tanan ang matagaan sa National Government para maka-provide sa maong Covid vaccine nga maoy maglikay nga dili na mataptan ang atong kaigsuonan nga mga Sugbuanon,” dugang sa mayor.
Si Duterte, sa iyang nasudnong pagpamulong sa miaging semana, niingon nga hayan sa Disyembre duna nay bakuna nga mapalit sa ubang mga nasod sama sa Estados Unidos ug China. Iyang gibutyag nga nakigsulti na siya kang Chinese President Xi Jinping aron iprayoridad ang Pilipinas kon naa na ang bakuna.
Gawas nga way kaseguroan nga duna nay mapalit nga bakuna sa Covid sa Disyembre kay naa pa kini sa human trials, dako ang kahigayunan nga mauwahi ang Pilipinas kay daghang adunahang mga nasod nga nanginahanglan niini.
FRONTLINERS BAKUNAHAN
Tinguha usab karon ni Labella nga mabakonahan og anti-flu ug anti- pneumonia vaccine ang libuan ka mga health frontliners nga nahimutang sa dakbayan sa Sugbo.
“I will convene our city officials, our City Health officials to discuss on the possibility of providing anti flu-vaccine and anti-pneumonia vaccine sa atong mga health frontliners sa dakbayan sa Sugbo kay exposed gyud kaayo sila. Mao nang atong tagaan og gibug-aton nga ato silang matabangan,” padayag ni Labella.
Ang pamahayag sa mayor nitumaw human gianunsyo sa Department of Health nga usa sa mga pamaagi aron maprotektahan ang mga health frontliners mao ang pagbakuna sa duha ka vaccine samtang wa pa ang bakuna batok Covid-19.