SUPERBALITA CEBU

Barrita: Silot sa kamatayon ug usa ka tanghaga

Tipik sa balaod

SA IYANG ikaupat nga State of the Nation Address (Sona) niadtong Hulyo 27, giawhag ni Presidente Rodrigo Duterte ang Kongreso sa pagpasar og balaod nga magpahamtang pagbalik sa silot sa kamatayon sa mga kaso sa illegal nga drugas.

Ang silot sa kamatayon diha na sa pagsugod sa buhilaman, sa sibilisasyon. Labi pa sa panahon sa mga hari ug mga emperor. Dinhi sa Pilipinas, gipahamtang kini samtang ubos pa kita sa Espanya. Ang atong nasudnong bayani, si Dr. Jose Rizal, gisilotan sa kamatayon pinaagi sa firing squad didto sa Bagumbayan, karon Rizal Park.

Gipahamtang ang silot sa kamatayon ubos sa Revised Penal Code. Gisuspenso kini sa 1987 Constitution, apan gipahamtang pagbalik sa mga heinous crime ubos sa Republic Act No. 7659 nga gipasar niadtong 1993. Apan gi-abolish kini sa Republic Act No. 9346 nga gipirmahan ni kanhi Presidente Gloria Macapagal Arroyo niadtong Hunyo 4, 2006.

Dunay uyon ug dunay supak sa pagpabalik sa silot sa kamatayon. Samtang lalisan pa kini sa hawanan sa Kongreso, modalikyat kita niining usa ka tanghaga mahitungod sa silot sa kamatayon.

Sa nobela nga “Don Quixote” ni Miguel Cervantes, si Sancho Panza, ang loyal nga luyo-luyo ni Don Quixote, gipatuo nga nahimo na siyang gobernador sa usa ka isla. Daghan sa iyang kunohay mga ginsakopan misang-at sa ilang suliran ngadto kaniya aron iyang sulbaron. Usa na niini kining mosunod.

Duha ka distrito giuwang og sapa nga mahimong tabukon agi sa usa ka tulay. Gipakanaog ang usa ka balaod nga ang mga tawo mahimong moagi sa taytayan apan ang matag usa kinahanglan nga manumpa nga nagtug-an siya sa tinuod kon asa paingon ug unsa ang tuyo. Kon mapamatud-an sa usa ka tribunal nga nagtug-an sa matuod, gawasnon siya nga moagi sa tulay. Kon mapamatud-an nga namakak, pagabitayon siya hangtod nga mamatay.

Daghan na ang mga tawo nga nangagi sa tulay kay klaro man nga nagtug-an sila sa tinuod. Apan nahitabo nga dihay usa ka tawo nga nanumpa mga moagi siya sa tulay kay pagabitayon siya. Naglibog niini ang mga sakop sa tribunal. Kon ilang paagion ug di nila bitayon ang maong tawo, nagpasabot nga namakak siya ug angay siyang bitayon. Kon ilang bitayon, nagpasabot nga nagtug-an siya sa tinuod, busa angay unta nga gawasnon siyang moagi sa tulay.

Mao kini karon ang tanghaga nga ipasulbad ni Sancho Panza, usa ka way grado ug gipatuo lang nga usa na siya ka gobernador. Matod pa ni Sancho Panza, katunga sa gipanumpaan sa maong tawo tinuod, ang laing tunga bakak. Libre siya sa tinuod, mabitay siya sa bakak. “The truth saves him, the falsehood equally condemns him.” Busa angay nga gawasnon siyang paagion sa tulay.

“It is always more praiseworthy to do good than to do evil,” matod pa ni Pancha. Dalaygon ang paghimo og maayo kay sa daotan. “When there was any doubt about the justice of a case I should lean to mercy,” matod pa niya. Kon adunay pagduda sa hustisya sa usa ka kaso, adto sandig sa kaluoy. - edbarrita@gmail.com


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph