Editoryal: Di maayong lugakan

Editorial Cartoon by Ariel Itumay
Editorial Cartoon by Ariel Itumay

GIPANGTANGTANG na ang uban nga mga quarantine checkpoint nga maoy hinungdan sa paghuot sa trapiko sukad ubos na sa general community quarantine (GCQ) ang Siyudad sa Sugbo.

Nanaghan ang mga sakyanan gikan sa ubang mga dapit sa Sugbo kay milugak na ang quarantine level ug nangbukas na ang daghang mga patigayon. Tungod sa mga panawagan, gibuksan ang mga control point aron di na maghuot ang trapiko.

Mapaabot na man gyud ning pagdaghan sa mga tawo sa siyudad kay sentro ang Cebu City sa economic activity. Daghang mga negusyante nga naa sa probinsya namuyo nga nagnegusyo sa siyudad. Daghan usab ang nanrabaho.

Apan angay bang lugakan ang border control points samtang naa pa ang hulga sa coronavirus disease?

Bisan unsa pa nga quarantine level, ang hulga sa Covid-19 nagpabilin. Nag-usab-usab lang kini tungod sa gidaghanon sa mga kaso. Mas daghan, mas hugot nga quarantine ang ipatuman. Wa magpasabot nga wa na ang virus.

Di ba nilugak na ang Siyudad sa iyang quarantine niadtong unang bahin sa Hunyo? Unsa may nahitabo? Nanaghan ang nangatakdan, daghan ang nangamatay, grabe ang kahimtang hinungdan nga naghuot sa mga Covid bed sa mga tambalanan.

Suma gud, unsay nahitabo sa Metro Manila karon human sila nilugak sa ilang quarantine level? Nanglugak pud sa ilang pagbantay. Nisulbong og maayo ang ilang mga kaso sa tag linibo kada adlaw. Niabot gud og 6,000 kapin ka mga kaso ang natala sa miaging adlaw.

Sa paglugak sa bisan unsang mga lakang batok sa Covid-19, di malikayan ang pagkompyansa usab sa mga tawo. Mao nga maayo ang desisyon ni Mayor Edgardo Labella nga ipabilin ang panginahanglan sa quarantine pass kon mogawas sa balay.

Kon molugak man gud, ang kahimtang sa panghuna-huna sa tawo mokompyansa sab. Unsay mahitabo? Dako ang kahigayunan nga managhan na sab ang Covid-19.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph