NAGKOMBUYA sila si Michael Porter Jr. ug Nikola Jokic sa Denver Nuggets aron nga watakwatakon ang San Antonio Spurs sa ilang bugno kagahapon, 132-126, sa VISA Athletic Center duol sa Orlando.
Nakapasulod og 30 puntos si Porter Jr gawas sa pagtala og career-high nga 15 rebounds, samtang si Jokic midugang og 25 puntos ug 11 ka mga assists.
Ang maong kadaugan nihatag higayon sa Denver (45-23) nga makakatkat ug makaduol og half-game sa LA Clippers alang sa ikaduhang luna sa Western Conference standings.
Samtang ang Spurs (29-38), napildi og duha ka sunod-sunod, nagpabilin sa ikanapulo nga puwesto sa West ug duha ka duwa luyo sa Memphis (kinsa napukan ngadto sa Utah sayo ning duwaa) sa panag-ilog alang sa ikawalo ug katapusang playoff spot sa conference.
Sa uban pang resulta sa duwa, gikunis-kunis sa Philadelphia 76ers ang Washington Wizards, 107-98, sa NBA Bubble kagahapon.
Nanguna sa dula sa 76ers mao si Joel Embiid nga mitala og 30 puntos, naglakip sa katapusan niyang 7 puntos.
Apan taliwala sa maong kadaugan, nawala sab sa Sixers si Ben Simmons sa ikatulong kuwarter nga giingong naangol ang iyang tuhod.
Nibiya si Simmons sa duwa nga dunay 8 puntos, 6 rebounds ug 4 assists.
Samtang gipatilaw na sab og kapildihan ang Memphis Grizzles sa Utah Jazz, 124-115, sa ilang seedings game kagahapon.
Kini na ang ikaupat ka sunod-sunod nga higayon sa Grizzles nga napukan sa bubble.
Nangamot sila si Joe Ingles ug Rudy Gobert sa Jazz aron nga maangkon ang kadaugan.
Mitala si Ingles og game high nga 25 puntos samtang si Gobert nihuman og 21 puntos ug 16 rebounds.
Mitampo sab si Mike Conley, kanhi magduduwa sa Grizzles, og 23 puntos kung diin tanang Jazz starters miiskor og double digits, nga maoy susi sa pagpukan sa Memphis sa ikaupat ka higayon.
Sa pagkakaron, ang Grizzlies, usa ka dula na lang ang lamang sa Portland Trailblazers alang sa No. 8 seed.