MAGSAYSAY, Davao del Sur -- Midako ug miawas ang tubig sa Bulatucan River, hinungdan nga nabahaan ang pipila ka mga balay sa Barangay Poblacion ning lugar niadtong Miyerkules sa hapon, Agosto 5.
Apan wala namakwit ang mga residente duol sa sapa ug ang uban miadto pa sa kilid sa sapa aron mamingwit og tilapya.
Bisan pa man, alerto gihapon ang Municipal Disaster Risk Reduction and Management Center (MDRRRMC) aron luwason ang mga residente kung ugaling mas modako pa ang tubig.
Nasayran nga kusog ang uwan sa kabukirang parte sa lungsod sa Makilala, North Cotabato niadtong higayona mao nga nahitabo ang dakong baha sa lugar bisan og hinay ra ang uwan sa ilang dapit.
Gipahinumdoman sab sa MDRRMC ang mga molupyo nga mag-amping sa tubig baha kay di lang delikado nga maaanod niini, makahatag kini og sakit ilabi na kung adunay samad sa panit.
Sa dakbayan sa Digos, nag-alerto sab ang City Disaster Risk Reduction and Management Office tungod sa matag adlaw nga pagdaut sa panahon ilabi na nga nakatilaw na sila og kusog nga pagbaha ug daghang apektadong pamilya niadtong Hunyo 28, 2020.