MIPAAMBIT si Dr. Bryan Albert Lim, internal medicine/infectious diseases specialist sa Cebu, pinaagi sa iyang Facebook post niadtong Agosto 4, 2020 diin iyang napanglantawan nga dako ang tsansa nga motumaw ang second wave sa coronavirus disease sa Sugbo.
Namatikdan ni Lim atol sa pagpatuman sa general community quarantine (GCQ) sa Cebu adunay mga Sugboanon nga wa na motamod sa “common prevention tips” sa katuyoan nga milakay sa virus, ilabi na ang pagsul-ob og mask ug ang social distancing.
TIPS
“Here are some tips to prepare for the next wave of COVID cases this coming September just in case (I hope and pray na hindi),” tipik sa natala sa post ni Lim.
Pangandam og P1 milyones ngadto sa P2 milyones nga pundo kay dako og gasto sa higayon nga malandig sa tambalanan gumikan sa maong balati-an ug sa kadtong manga-ayo laing gastuhanan alang sa post-Covid care.
Tambag ni Lim nga mamundo og kuwarta ug dili pa karon angayan nga mopalit og mga katigayonan sama sa balay ug yuta.
Gikinahanglan sab nga pakisayran ang dapit nga magsilbing isolation room ug kon dili mamahimo sa inyong kaugalingong balay mas maayo nga makig-alayon ngadto sa barangay kabahin sa isolation o quarantine center nga maoy dangpan sa higayon nga makasinate na sa mga sintomas sa virus.
Angayan sab nga makigsabot ngadto sa inyong suod nga higala o sakop sa pamilya nga simbako mataptan sa maong balatian adunay moabag nimo sa pagkuha o pagpalit sa imong mga gikinahanglanon nga magamit atol sa duha ka semana nga i-isolate.
Sutaon sab daan ang contact number sa mga labing duol nga tambalanan o sa city command center hotline alang sa mas dali nga pagtawag ug dali nga marespondihan.
Pahiumdom sa kadtong adunay ubang sakop sa panimalay nga kon mahimo dili kanunayon ang ilang paggawas ilabi nga sagad sa mahitabo, sa higayon nga sila ma-infected gikan sa gawas sila maoy magdala sa virus sud sa balay og motakod ngadto sa ubang sakop sa pamilya.
Sa mga mataptan, iandam nang daan ang kaugalingon ilabi na ang huna-huna kay mag-inusara ka atol sa quarantine period.
“Getting admitted for Covid is very very very lonely. You are alone the whole time, even when you are gasping for air, you do so alone,” pasidaan ni Lim.
Kinahanglan sab nga aduna kay “network for plasma” magpangutana ka nang daan sa posible nga blood donor nga adunay susama og blood type, panagana lang sa higayon nga ikaw magkinahanglan.
FUNERAL PLAN
Mitambag sab si Lim (dili ingon sa nanungo) sa posibleng dangatan sa umaabot ilabi na niining pakigbatok sa Covid-19, sa karon nga panahon mas bintaha kon mag-invest nang daan og memorial / funeral plan.
“Expensive to die as well. Cremation is pricey,” dason ni Lim.
Panahon na sab nga mokuha og insurance aron sa pagsiguro sa kaugmaon, ilabi na karon nga adunay kontrobersiya sa Philhealth, busa gikinahanglan nga adunay back-up plan.
Sa kadtong aduna nay insurance policy ipangutana sa ahente kon pila coverage kon simbako mataptan sa Covid, alang sa kasayon ug kasayuran dili lang sa pasyente apan lakip na ang kabanay.
Katapusang pahinumdum ni Lim kanunaya ang pagpadayag sa inyong gugma ngadto sa iyang mahal sa kinabuhi kay ang Diyos ray nasayod kon unsay atong atubangon sa sunod adlaw niining panahon sa pandemic.
Dugang pa-ambit ni Lim nga magpangulbaan siya sa higayon nga makakita og tapok sa mga tawo nga wa magsul-ob og face mask bisan nga anaa pa sa GCQ status ang Sugbo.
Gani, aduna siyay malabyan nga kan-anan kansang mga serbidora wa mag-mask ug iyang tunolan og libre nga mask aron maoy ilang magamit.
“Dili na kailangan, sir, sige man ko vitamin C ug painit, immune ra ko ani,” tubag sa taga-karenderya.
UPDATE
Sa labing uwahi nga natala sa World Health Organization (WHO) ug Department of Health dugang 3,462 ka mga nagpositibo sa Covid-19 sa Pililipinas sukad niadtong Agosto 5 ug moabot na ngadto sa 115,980 ang kinatibuk-ang kaso sa nagpositibo.
Samtang sa tibuok kalibutan mitala na ngadto sa 18.5 million ang confirmed cases, 700,896 ang nangamatay sa Covid ug adunay 11,155,831 ang naka-recover.