DUGAY na kining kinawatay diha sa Philippine Health Insurance Corporation (Philhealth). Gi-imbistigar na kini kaniadto tungod kay daghan kaayong mga ospital nga mokobra og re-imbursement gikan sa Philhealth agig bayad kunohay sa tinumo-tumo nga mga pasyente. Diha kadtoy mga ospital nga naningil og ginatus ka libo tungod kunohay sa pasyenteng nagpa-opera sa mata ug ubang mga sakit sama sa dialyses. Of course, nagkumboya ang mga taga-ospital ug ang Philhealth officials.
Karon dili na linibo apan binilyon na ang makawat kay sindikato na man ang nag-operate karon pinaagi sa mga overprice. Ang nakawkaw mikabat og P15 bilyones. Kinahanglang papahuwayon usa ni Presidente Rodrigo Duterte si Philhealth president and CEO Ricardo Morales ug mga kaubang opsiyal samtang himuon ang imbestigasyon batok kanila. Kini si Morales usa usab ka retired general sa militar. Kinahanglang limpiyuhan ang Philhealth sa labing madaling panahon tungod kay gikahadlukan nga mabangkaruta kini sa sunod tuig labi na kon magpadayon kining Covid-19. Makalulooy ang mga sakop nga maoy tinuod nga tag-iya niini pinaagi sa ilang kuntribosyun.
* * *
Dia na usay laing problema sa katawhan niining panahun na unta sa general community quarantine (GCQ) . Kini ang pagpasul-ob og face shield sa mga mosakay og pampublikong sakyanan. Magsugod kini sa Agusto 15, apan magsugod na karong adlawa ang pagsul-ob niini sa mga mosakay og barko ug ubang sakyanan sa dagat. Sa ato pa, ang face mask magpabilin og pa-ibabwan kini sa face shield. Makalulooy ang mga kabus nga naglisud gani intawon og palit og facemask nga tag-bayente pisos, pun-an pa sa shield nga tag-P70 ang labing barato. Kining maong kantidad maayo na untang ipalit og sud-an kay lisud ang pagpangitag trabaho karong panahuna. Hinaut pang ang gobiyerno maoy mohatag og face shield niadtong mga kabus ug timawa.
* * *
Kinahanglang makig-alayon ang Cebu City sa mga ahensiya sa pagpakigbatok sa Covid-19. Karong bag-o, mireklamo si Police Regional Director Brig. Gen. Albert Ignatius Ferro nga wa sila kunsoltaha sa Siyudad sa dihang nag-imprinta sila og dugang 175,000 ka mga QR coded quarantine passes aron ipuno sa unang 175,000. Gikuwestiyon usab niya ang kasugoan ni Mayor Edgardo Labella sa pagpaguwa na sa katawhan matag Dominggo basta magdala lang og QR pass. Nahadlok siyang mao kini ang makadugang sa mga matakdan sa Covid-19.
Nakasabut kita ni Ferro kay sila man maoy mopatoman sa mga lagda nga ipakanaug sa IATF apan maayong masayud siya nga ang mayor gihatagan og katungod sa IATF nga mohimo og mga lakang nga iyang gituhoan nga maoy makaayo sa kampanya batok sa Covid-19. Usa niini mao ang pagpadayon niya og pagpagamit sa quarantine pass bisan kon wa na unta kini kinahanglana panahun sa GCQ sama sa siyudad. Apan nagtuo gihapon ako nga kuwang pa ang coordination sa city hall ngadto sa ubang mga opisyal sama sa gireklamo ni Konsehal Joel Garganera sa local IATF. (mannyrabacal1144@gmail.com)