USA ka locally stranded individual (LSI) ang ika-170 nga kaso sa coronavirus disease (Covid-19) sa Cagayan de Oro human kini nagpositibo sa Sars-CoV-2.
Kini siya usa ka 36 anyos nga lalaki nga LSI gikan sa Laguna ug residente sa Barangay Tablon. Miabot siya sa Cagayan de Oro Hulyo 17 pinaagi sa eroplano. Gidala dayon siya sa city isolation unit pag-abot niya sa dakbayan.
Gibutyag ni City Health Office Epidemiologist Dr. Joselito Retuya nga ang resulta sa unang swab sa lalaki migawas nga negatibo. Apan ang iyang kwarantina gi-extend human nagpositbo ang duha niya nga na-cohort nga roommates.
Gi-swab siya usab Agosto 4 ug ang resulta migawas nga positibo Agosto 5.
Sa pagkakaron, ang 36 anyos nga lalaki asymptomatic ug wala'y comorbidity. Nagpabilin siya karon sa Temporary Treatment and Monitoring Facility.
Nakatala usab ang City Health Office og lima ka bag-ong mga pasyente nga nag-recover sa Covid-19, tulo niini mga LSI ug duha mga returning overseas Filipino workers (ROF).
Ang kinatibuk-ang ihap sa mga pasyente nga nag-recover sa Covid-19 sa dakbayan anaa na sa 105.
Ang mga Covid-positive recoveries mao ang:
* Usa ka 23 anyos nga babaye nga LSI gikan sa dakbayan sa Lapu-Lapu ug residente sa Barangay Bonbon;
* Usa ka 27 anyos nga lalaki nga ROF gikan sa Middle East ug residente sa Barangay Gusa;
* Usa ka 5 anyos nga lalaki nga LSI gikan sa Puerto Galera, Mindoro ug residente sa Barangay Camaman-an (anak sa ika-102 nga kaso, kinsa usa ka 28 anyos nga lalaki nga LSI);
* Usa ka 35-anyos nga lalaki nga LSI gikan sa Bulacan ug residente sa Barangay Bugo; ug
* Usa ka 32 anyos nga lalaki nga ROF ug residente sa Barangay Macasandig.
Matud ni Acting City Health Officer Dr. Lorraine Nery nga ang 105 nga total Covid-19 recoveries naglangkob sa 61.71 porsyento sa kinatibuk-ang kaso sa Covid-19 sa dakbayan.
Sa pagkakaron, ang Cagayan de Oro City adunay 58 nga mga active cases, diin ang 53 niini mga ROFs/LSIs ug ang lima mga local cases.