USA ka driver mechanic naangol human gipusil sa iyang silingan gamit ang airgun nga ang bala dyolin niadtong Martes. Agusto 4, sa alas 6:00 sa gabii sa Purok , San Francisco, Barangay San Jose, lungsod sa Borbon.
Si Francisco Clarin, Jr. alias Junior, 36, dunay kapuyo ug driver mechanic sa maong dapit samdan sa iyang tiyan.
Samtang nadakpan sa hot pursuit operation ang suspekdo nga si Lee Bryan Magdadaro, 40, minyo, usa ka drayber ug molupyo sa naasoy nga dapit.
Si Police. Lt. Samuel Negro, Hepe sa Borbon Police Station nga nahinabi sa Superbalita Cebu, nagkanayon nga ang biktima ug suspek nagkalalis sa wala pa nahitabo ang krimen.
Ang biktima sakay sa iyang motorsiklo padulong mopauli ug nagsakay sab sa iyang motorsiklo ang suspek dihang ang duha nagkalalis.
Nahitabo ang kaguliyang apan nauwang sa ilang silingan.
Mipauli ang suspek apan nibalik dala ang duha ka airgun nga ang bala dyolin ug nagdala sab og sundang dihang gisulong niya ang biktima.
Sa pag-abot niya sa panimalay sa biktima, gipusil dayon niya hinungdan nga naigo sa tiyan.
Nisibat ang suspek samtang, ang biktima gidala sa Vicente Sotto Memorial Medical Center (VSMMC) sa dakbayan sa Sugbo ug gioperahan aron makuh ang bala nga dyolin na nalubong sa tiyan niini.
Matud ni Police. Lt. Negro, nga ang karaangpanagbangi sa duha bahin sa agianan sa ilang dapit maoy motibo sa krimen. (GPL)