NUNOT sa pagbunok sa uwan, duha ka mga sityo sa Barangay Basak, dakbayan sa Lapu-Lapu ang gilunopan ug dugay nihubas ang tubig bisan sa paghunong na sa uwan hinungdan sa dakong kahasol sa mga lumolupyo ug dakong risgo sa sakit.
Si Mayor Junard Chan daling nisusi sa dapit ug iyang nasuta nga walay klaro nga drainage system sa Sitio Tungdon ug Tangke sa Basak.
Matod ni Chan, ang sistema sa kanal sa dapit maoy sulbad sa problema.
Bisan walay budget niini sa pagkakaron, si Chan niingon nga mangita og pamaagi aron masugdan ang proyekto sa labing daling panahon.
Makigtagbo siya sa City Engineering Office aron masuta pila kaha ang magasto sa kagamhanan kalabot niini.
Nasuta sa mayor nga ang gibahaan dunay kanal apan di epektibo sanglit sumpay kini sa dagat ug kon motaob ang dagat, dason niya, dili moaghos ang tubig nga moresulta sa pagbaha sa dapit.
Sa pagkakaron, prayoridad sa kagamhanan ang pagbomba ug pagsuyop sa mga tubig nga napundo sa lugar aron maminosan ang tubig nga molusot sa drainage.
Usa sa mabasol sa maong suliran mao ang nagtrabahong kontraktor sa usa ka fishpond sa lugar nga giingong iya sa Department of Environment and Natural Resources (DENR) apan gipaabangan.
“Ang kadtong ilang application for fishpond ilang giabunohan og anapog nga walay pagtugot sa city so napuno na ang fishpond ug filling materials,” matod sa Mayor.
Nagtuo ang mayor nga inay fishpond ang gitrabaho sa lugar, usa kini ka subdivision sanglit ila na kining gi-reclaim.
Adunay koral sa lugar nga way fencing permit nga nakapasamot sa baha sa lugar.
Plano sa mayor nga mopadala og suwat ni DENR Secretary Roy Cimatu kalabot sa mao nga suliran. (GCM)