MOABOT na sa P202 bilyones ang kasamtangan nga assets sa Probinsya sa Sugbo.
Kini maoy gipahibawo ni Gobernador Gwendolyn Garcia atol sa mensahe niini alang sa ika-451 nga kasumaran sa pagkalalawigan sa Sugbo sa Agusto 6.
Ang assets nga P34 bilyunes niadtong 2018 nadugangan og P168 bilyones.
Matod ni Garcia nga ang nadugang nga mga kabtangan gumikan sa pagbawi sa properties sa Probinsya niadtong 2019 nga nahiadto sa pribadong mga kompaniya.
Nalakip na niini ang pagbawi sa Probinsya sa gipanag-iya nga luna sa Salinas Drive sa Barangay Lahug, Dakbayan sa Sugbo, access roads sa Cebu IT Park, pag turnover sa ikaduhang edipisyo sa FLI- Cyberzone Cebu (FCC) ug uban pa.
Dugang sa gobernador nga sa mas dako nga bahandi sa Probinsya, mas mag malambuon usab ang mga lungsod ug syudad sa lalawigan.
“Nasayod ako nga kadaghanan ninyo naghulat, kadaghanan ninyo ang mga nangutana kanus-a mahuman. Tagai ta og gamayng panahon, we are doing everything humanly possible inspite of our 50 percent skeletal workforce to achieve all of these projects because you have long deserved this,” matod ni Garcia sa Agusto 6.
PAGPALAMBO
Sa iyang mensahe, gipasabot ni Garcia nga human nakalatas ang Probinsya sa pagpaubos sa enhanced community quarantine (ECQ) kinahanglan na usab nga mo-irog alang sa enhanced countryside development (ECD).
“In order to progress, we will be moving outside into our towns and cities and bringing development to the countryside,” matod sa gobernador.
Una na nga mipahibawo si Garcia nga di igo ang supply sa pagkaon sa lalawigan sa Sugbo busa gikinahanglang palambuon ang agrikultura.
Iya kining nakita sa nanglabay nga mga buwan sukad gisugdan ang quarantine tungod sa hulga sa coronavirus disease (Covid-19).
Iyang tumong ug tuyo sa paggahin og pundo sa kalungsoran ug syudad aron makapalambo sa sektor sama sa turismo, negosyo ug agrikultura.
Nalakip sa lakang mao ang pag-ugmad og kaugalingon nga vegetable garden sa matag barangay, purok ug panimalay.
Sa maong paagi, mas matabangan ang matag pamilya nga makaani ug makakaon ilabi na sa panahon sa krisis nga nihit ang pangita gumikan sa restrictions.
Gahinan sa Probinsya sa Sugbo og P15 milyones nga pundo si Bise Gobernador Hilario Davide III samtang tag P5 milyones alang sa 18 ka mga bokal sa lalawigan sa Sugbo alang sa pagtabang sa mga micro, small ug medium enterprises nga makabangon ug makasugod gumikan sa nasinati nga krisis tungod sa pandemya.
Makadawat usab og tag P2.5 milyones ang matag lokal nga kagamhanan.
Ang P1 milyon igahin alang sa pagpamalit og bitamina alang sa mga konstituente niini, P500,000 alang sa pagpamalit usab og air purifiers, ultraviolet sterilizing lamps nga ipamutang sa mga opisina sa kagamhanan.
Kini aron malikay sa kagaw sa Covid-19.
SUGBUSOG
May P500,000 usab nga gigahin alang sa pagpatuman sa SugBusog nga programa sa probinsya ug laing P500,000 nga pundo alang sa paghimo og mga tamnanan sa pagpatubo og lemonsito, turmeric ug uban pa nga tanom nga makatabang sa pagpalig-on sa immune system.
Nalakip sa makadawat og pundo nga moabot sa P100,000 ang matag barangay alang sa pagpatuman usab sa SugBusog sa mga purok ug sitio.
Aron masiguro nga matarong paggasto ang pundo, moluwat og lagda si Garcia aron mahasubay sa price ceiling nga ipatuman lukop probinsya. (ANV)