UPAT ka gikatahapang mga gun-for-hire nadakpan sa kapulisan sa managlahing mga operasyon sa Sugbo niadtong Miyerkules, Agusto 5, 2020.
Ang upat nga dunay warrants of arrest sa managlahing mga kaso gitumbok nga mga sakop sa duha ka mga drug syndicate nga nag-operate sa dakbayan ug lalawigan sa Sugbo.
Ang operasyon hiniusang gilusad sa Regional Intelligence Unit (RIU) 7, Criminal Investigation and Detective Group (CIDG) 7,Cebu City Police Office (CCPO) ug Mandaue City Police Office (MCPO).
Si Police Lieutinant Colonel Arnie Cuaresma, bag-ong pangu sa RIU , maoy nangu sa tulo ka mga operasyon sa samang adlaw.
Alas 5 sa kaadlawon sa Agusto 5, unang nadakpan sa kapulisan si Ponciano Otom, alyas Balingay, sa Barangay Paknaan, Dakbayan sa Mandaue.
Si Otom nag-atubang og lima ka mga kasong child abuse tungod sa giingong paglugos sa usa ka 12 anyos gikan niadtong Agusto ngadto sa Septiyembre 2017 ug Nobiyembre 2017 ngadto sa Mayo 2018.
Si Regional Trial Court (RTC) Branch 26 Judge Faith Trumata Rebotiaco sa lungsod sa Argao maoy miluwat sa warrant of arrest batok kang Otom.
Dunay P180,000 nga piyansa matag kaso nga girekomendar sa korte alang sa temporaryong kagawasan sa akusado.
Pasado alas 7 sa buntag sa samang adlaw, nasikop usab sa kapulisan ang managsuon nga Gilbert Archival, alyas Mayor, ug Ariel Archival, sa ilang gitaguan nga pinuy-anan sa Sityo Tac-an, Barangay Budlaan, Dakbayan sa Sugbo.
Unang nadakpan si Gilbert human nga dunay warrant of arrest sa kasong pagpatay nga way gitakda nga piyansa.
Si Assisting Jude Bernardito Malabago sa Regional Trial Court Branch 60 sa lungsod sa Barili maoy niluwat og warrant of arrest batok kang Gilbert.
Nakuhaan si Gilbert og usa ka .38 caliber revolver nga dunay tulo ka mga bala hinungdan nga pasakaan usab siya og kasong ilegal nga paghupot og armas.
Paglabay sa 15 minutos, nadakpan usab si Ariel sa raiding team human naaktohan nga may dala nga kalibre .45 nga pistola nga dunay unom ka mga bala sulod sa magazine nga giluklok sa hawakan.
SINDIKATO
Matod ni Cuaresma nga sila si Otom ug managsuong Archival mga sakop sa Dumaboc crime and drug syndicate nga naglihok sa probinsiya sa Sugbo ug mga bukirang barangay sa Cebu City.
Gawas sa ilang kalambigitan sa grupong Dumaboc, kanhi mga sakop usab sila sa Quirante drug syndicate nga naglihok sa habagatang bahin sa Lalawigan sa Sugbo.
Matod ni Cuaresma nga ang tulo puro mga gun-for-hire.
Samtang ikaupat nga nasikop mao si Neil Armando June Baylosis nianang pasado alas 8 sa buntag sa Villa Vista Subdivision, Barangay Bulacao, Dakbayan sa Talisay.
Si Baylosis dunay warrant of arrest sa kasong murder nga way girekomendar nga piyansa sa sala ni Malabago.
Dugang ni Cuaresma nga si Baylosis bag-ohay lang nga miyembro sa Sabalones drug syndicate nagsilbi usab nga gun-for-hire.
Ang upat kasamtangang gitanggong sa CIDG 7 facility sa Gorordo Avenue, Dakbayan sa Sugbo.