Danish national nasikop sa buy-bust sa Bohol

Hulagway tampo gikan sa PDEA
Hulagway tampo gikan sa PDEA

Usa ka langyaw nasikop sa buy-bust sa Philippine Drug Enforcement Agency Bohol Provincial Office alas 11:15, Huwebes sa gabii, Agusto 6, 2020.

Ang operasyon nga gipahigayon sa Barangay Taloto, Tagbilaran City giabagan sa Panglao Police Station, Tagbilaran City Police Station ug 702ND Regional Mobile Force Battalion 7.

Ang suspek giila nga si Kim Rasmussen 55, Danish national, kasamtangan nga nagpuyo sa maong barangay.

Lakip sa nadakpan ang iyang kauban nga maoy iyang sugoon nga si Vinz Excel Sumatra, 23, taga Booy District ,Tagbilaran City.

Nakuha gikan kanila ang 12 ka pakete sa gituohang shabu nga motimbang og 2.5 grams nga mobalor og P17,000 base sa Dangerous Drugs Board (DDB) value.

Matod ni Leia Alcantara, information officer sa PDEA-7, nga moabot sa lima ka adlaw ang surveillance sa mga operatiba sa langyaw.

Nakadawat silag impormasyon nga kusog mogamit sa illegal nga drugas si Rasmussen ug mamaligya usab aron masustiner niya ang iyang bisyo.

Giingong maka baligya kinig lima ka gramos matag semana ngadto sa customers.

“Ang kining Danish National siya gyud ang tag-iya sa items. Nya ang kanang Pinoy maoy cohort niya, maoy iyang sugoon paghatod sa bayad. So, kaning duha pud according sa atung information user pud ni sila,” matod ni Alcantara.

Si Rasmussen nagtrabaho sa usa ka kompaniya nga maoy mopadala sa mga kargamento sa bisan asang bahin sa kalibutan.

Dugang ni Alcantara nga si Rasmussen moagni sa mga batan-ong babaye sa Tagbilaran nga moapil sa pagsuyop sa illegal nga drugas sulod sa iyang panimay ug iya dayonng pahimuslan kon ma high na. (AYB)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph