Gibutyag ni World Boxing Association (WBA) welterweight (147 lbs) champion Manny Pacquiao nga andam siyang makigharong kang middleweight (160 lbs) star Gennady Golovkin apan sa usa ka kondisyon – 147 ang timbang.
Ang kanhi trainer ni Pacquiao nga si American Freddie Roach mao ang nagpagawas ning maong ideya nga alang kaniya, maghatag og kahigayunan kang Pacquiao nga makabaton og world title sa lain na sab nga weight category.
Ang Pambansang Kamao ng Pilipinas kasamtangang 8-division world champion.
Naghisgot si Roach nga puwedeng magtagbo sila si Pacquiao ug Golovkin sa usa ka catchweight sa milabay nga pipila ka mga buwan.
Human niini, wala na nahunong ang pagkatap ning maong ideya sa nagkadaiyang mga taho nga adunay kalambigitan sa boksing.
Apan alang kang Pacquiao, dili siya moahat pagpakig-away kang Golovkin kon lapas sa 147 ang timbang.
“As long as it is 147-pounds, I am okay with that. But if it’s above that, it’s too big for me,” matod ni Pacquiao sa interiew sa Manila Times.
Sa katapusan niyang away, si Golovkins mitimbang og 159.2 lbs. niadtong Oktubre sa miaging tuig batok kang Sergiy Derevyanchenko.
Samtang si Pacquiao mitimbang og 146.5 lbs. sa katapusan niyang away batok kang Keith Thurman niadtong Hulyo sa miagi sab tuig.
Dul-an sa usa ka dekada ang nakalabay, si Pacquiao miaway sa junior middleweight (154) ug yano niyang gidispatsar si Mexican Antonio Margarito aron angkunon ang bakanteng World Boxing Council (WBC) super junior middleweight title. / ESL