Dear Noy Kulas,
Tinuod ang giingon nga ang gugma mokalit lang og tunga nga wa paabuta. Mao ni ang nahitabo nako.
Tawga lang ko og Grace, 34 years old ug single mother. Sa pagsugod sa quarantine, usa sa akong boarders wa mouli kay naapeke sa kwarta. Wa lagi silay trabaho, wa na ko siya paabanga kay maluoy ko kay way income. Siya ang akong sugo-suguon kon duna koy gustong paliton. 21 anyos pa ni siya ug nakahuman ra sa second year college pero tungod sa kalisod, wa makahuman.
Hangtod nga naluoy ko ani niya tungod kay matinahuron ug matinabangon. Iya sab giatiman ang akong anak kon busy ko sa tindahan. Karon naay usa ka gabii, sa akoy ka laay, ako siyang gihagad og inom. Nagtagay mi nga kami rang duha. Ambot unsay nasulod sa akong ulo nga ako siyang gitintal ug dunay nahitabo namo. Kada human sa pagpanira nako sa tindahan, mao dayon ni ang among buhaton. Sweet kaayo ming duha kon kami ra. It’s like husband and wife. Misamot ko ka pinangga niya.
Wa koy problema kay single mother ko. Pero unsa kahay ikasulti sa akong pamilya no nga mipatol ko og batan-on unya worker ra? Maayo kaha ni, Noy Kulas, ang nahitano nako ron? Pero love namo ang usag usa kay misamot ko ka pinangga niya.
GRACE
Grace,
Love in the time of Covid diay ni inyoha. Wa may problema tingali kay di kaayo lagyo ang age gap. Pero ang tanan depende ra na ninyo. Ambot wa ba sab kaha na siya mabag-ohi nga sige siya og tilaw sa himaya unya libre pa sa iyang tanang needs. Nindot ra ba gyud sagad ang relasyon basta bag-o pa.
Likayi lang sa nang grabe ninyo ka intimate nga relasyon labina kay wa pa siyay klarong kahinguhaan. Lisod nang magbunga sa panahon nga di sakto. Lisod manganak rong panahuna nga naa tay kaaway nga di makita.
Maayo usab nga maneguro nga ang lalake wa lang mag-apas sa imong lawas ug sa imong kahimtang nga sa akong tan-aw maayo. Lisod na kon magbunga unya mohawa ra diay siya. Basin nagahuwat ra na siya na ma normal na mohawa ra siya. Maayo nang maneguro aron di basulan sa kaulahian.
NOY KULAS