Sukad nga gihamok kita niining makalilisang nga coronavirus disease 2019, kanunay natong madunggan ang daghang pasidaan gikan sa mga tinugyanan sa panglawas. Gitumong kini nga malikay ang mga tawo sa tinakdanay sanglit ang maong virus di man makita. Mga checkpoint ug curfew gihingusgan pagseguro nga di makapatuyang og suroysuroy labi na kadtong mga gahi og ulo.
Sa higayon nga dunay mag-positive subsob nga pagpangita o contact tracing sa mga tawo nga gikauban sa pasyente ang pasiugdahan. Tumong niini mao ang pagsanta sa pagkuyanap sa virus. Luyo niining tanan nga paningkamot, ang listahan nagpakita nga nagpadayon ang iniphanay sa mga natakdan. Wala ug tuo nga contact tracing ang gigahinan og dakong pundo sa panudlanan sa gobyerno.
Nindot. Pero ang gusto unta nakong madunggan mao ang pagpangita sa mga tawo nga gabok na kaayo og immune system tungod kay minos sa mga bitamina ug minerales ang ilang gikaon tungod sa kalisod sa pagpuyo karon.
Daghang estorya nga gihimong kataw-anan ang pagpang-apod-apod og mga sardinas. Tinuod man na. Unsa nga matang sa immune system ang imong mapaabot kong kanunayng nagkutoy ang imong tiyan. Gusto sa gobyerno nga molahutay ang imong immune system pagbatok sa Covid-19 pero wa man say suporta.
Nakadungog ba mo nga dunay gipang-apud-apod nga mga bitamina diha sa mga batangay? Bisan siguroon nalang unta ang mga senior citizen ug mga bata. Kusog ta mangita sa mga posibling natakdan.
Pero giagian lang sa mga nangita ang mga tawo nga dali rang matakdan tungod sa ka gabok sa ilang immune system. Maayo kaayo tang moawhag nga palig-onon ang immune system pero sardinas ug noodles ray matunol uban sa pipila ka kilong bugas.
Subay niini angay nga hangpon ang suporta nga itunol sa kapitolyo alang ning maong katuyoan. Sa iyang pakigpulong atol sa ika 451 ka tuig nga founding anniversary sa probinsiya sa Sugbo.
Gipahibalo ni Gob. Gwen Garcia nga tagsa ka milyon ka pisos nga gahin ang i-apud-apod sa mga lungsod ug ciudad isip suporta sa mga molupyo sa ilang pagpananom sa semilya nga mahimong tinubdan para pagpalig-on sa immune system. Ubos kini sa programa nga gitawag og Sugbuanong Busog. Wala pa ni labot sa laing minilyon ka pisos nga suporta para sa pagpabangon sa ekonomiya.
Karong adlawa, Agusto 9, maoy ika-80 ka tuig nga kasumaran sa adlawng natawhan sa nitaliwan nakong amahan. Papa Dading happy birthday in heaven. Gikan ni Mama Nating ug sa imong mga anak.
Unya usa sa imong apo nga wala na nimo maabti ang iyang pagkatawon magsaulog sab sa iyang birthday ugma. Happy Birthday Vin Isidore Augustine Nadela Mascara. Pwerte ra bang liwata nimo ning imong apo. Pagtimbaya gikan sa iyang sis Nikka ug Tatay Aga ug Nanay Monique.