Dili ko mosagop sa pagtuo nga magkabulag sa politika sila si Mayor Edgar Labella ug Vice Mayor Mike Rama. Gikapulot ang ilang prinsipyo. Bintaha nga dunay fiscalizer nga modangop sa checks and balance. Himsog ang ilang panagsungi nga giliyokan sa katahom sa demokrasya.
Gisaway ni Rama ang pag-umol sa Sinulog governing board nga naa namay Sinulog Foundation ug mayor’s information liaison office (Milo) nga naa may kapitan. Gani ilang gisaway kadtong barangay mayor’s office (BMO) ni kanhi Mayor Tomas Osmeña. Gimud-an ni Rama ang nagkasumpaki nga executive orders.
Unahon ni Labella ang tulo ka andana sa Cebu City Medical Centerr (CCMC0 aron magamit gilayon apan gusto ni Rama nga humanon ang 10-storey una pa gamiton.
Giingon nga walay pirmanenting alalay sa politika. Kauban kaniadto si Osmeña ug Mayor Alvin Garcia apan nagkaatbang, Osmeña ug Rama apan kaduha magtigi, Osmeña ug Labella apan nagkontra sa miaging eleksyon.
Misawsaw si Osmeña nga gipaburot ang presyo sa bugas ug sardinas ning panahon sa pandemya. Mipasidlak sa Osmeña republic pinaagi sa streamer “Tuman aron ang tanan OK”. Pasilong lang sa Mike kay ulan pa.
Sa 80 ka mga kapitan, 50 kanila nahigugma pa ni Osmeña. Pun-an sa nagkasungi nga kaubanan. Konsehal Niña Mabatid mikiha og libelo batok Jun Alcover ug Ramil Ayuman human gitumbok nga misulay og hilot sa kasong sexual harassment ni kanhi Kamputhaw Kapitan Lorenzo Basamot nga gipasaka sa tulo ka mga kawani.
Ang city administrator nga si Floro Casas Jr. mipasakag cyber libels batok Alcover human gitumbok nga wala ipagawas ang pundo para sweatshirts sa mga habalhabal driver nga gisaad sa mayor.
Binasolay tali ni Casas ug Dr. Daisy Villa sa City Health Department kabahin sa testing sa asymptomatic sa Luz. Lalis ni Casas ug Konsehal Joel Garganera bahin sa pag post sa granular lockdown.
Gihilot ni Labella ang panagbangi. Naningkamot nga magkahiusa pag-asdang sa katalagman. Duha na ka higayon nakaapod-apod og minilyon pesos sa 80 ka barangays. Duha ka hugna ang pagpanghatag og 25 kilos nga bugas matag pamilya nga sa unang hugna giubanan og food packs.
Giaporan og P1M ang Sangguniang Kabataan (SK) sa 80 ka barangays pagpatuman sa ilang proyekto. Gahin para hazard pay sa mga kawani sa city hall ug barangays, Champ ug cash aid sa mga senior ug PWD.
Nagpaulan sab og hinabang sila si Sen. Sherwin Gachalian, Sen. Bong Go ug ubos balay-balaoranan pinaagi nila House Speaker Alan Peter Cayetano ug Deputy Speaker PJ Garcia alang sa dakbayan sa Sugbo. (csa_1156@yahoo.com/09064648954)