Nagkaduol na ang gilugwayan nga pormal nga pag-abli sa school year (SY) 2020-2021 sa Department of Education (DepEd) karong Agusto 24. Duha na lang ka semana, ang mga tinun-an sa elementarya ug sekondarya mobalik sa ilang pagtutok sa pagtuon apan dili na moadto sa mga tunghaan. Ang klase ipaagi na sa online aron paglikay sa mga bata batok sa coronavirus disease 2019 (Covid-19).
Tungod sa naasoy nga kabag-ohan ug kabalaka sa Covid-19, daghang ginikanan ang wala una mopatungha sa ilang mga anak. Wala usab seguro makauyon sa online nga sistema nga gidalidali sa pagpatuman ug samtang wala pay bakona sa Covid-19. Sa kinatibuk-an, ang nagpa-enroll alang sa SY 2020-21 mikunhod pag-ayo bisan sa igong panahon sa enrollment.
Ang online nga klase dakong hagit dili lang sa mga tinun-an, lakip sa usab sa mga magtutudlo nga wa pa makasuway sa maong pamaagi. Laing kuwestiyon mao ang kapasidad sa magtutudlo. Gawas sa teknolohiya nga magamit, labaw sa tanan, ang online wala pa masulayi sa iyang kaapektibo diha sa halapad nga pagpatuman sa publikong tunghaan.
Sa positibong panglantaw, atong kutluon ang mensahe nga gipasapasa sa social media. Maayo ang online nga klase human makadaginot sa balon sa bata o panahon sa ginikanan. Layo sa disgrasya sa dalan. Makapahuway og sakto ang bata human dili magsayo og mata. Pwede nakatubag sa module sa pagtuon bisan asang dapit sa balay o punoan sa kahoy. Mas luwas sa pagtakboy sa Covid-19.
Ang online nga klase maayong kalamboan alang sa digital education. Usa seguro kini sa positibong epekto sa Covid-19 pandemic nga nagduso sa nagmika nga pagpatuman sa damgo nga digital nga nasod. Tinuod nga daghang balidong isyu sa pagsugod sa online nga klase apan seguradong molambo kini sa dagan sa panahon.
Maayong dili ihikaw sa mga ginikanan ang talagsaong kasinatian sa ilang mga anak nga mahimong kabahin sa dakong kausaban sa kasaysayan sa edukasyon, online nga klase.