Naghuwat na lang sa Environmental Compliance Certificate (ECC) ang ordinansahon nga maoy sumbanan sa paghimo og sementeryo sa Barangay Sapangdaku, Dakbayan sa Sugbo.
Si Konsehal Dave Tumulak, kinsa maoy nangamahan sa ordinansa, niingon nga kon maabot na ang maong dokumento, para sa approval, ila nang lihukon ang ordinansa alang sa second ug third o final reading.
Ang konsehal nagkanayon nga kon dili pa maabot ang ECC, magpabilin una sa City Council ang ordinansahon sanglit di kini maaprohahan kon wa ang maong dokumento.
“Naghuwat nalang ta sa ECC ug kon naana to ang dokumento ipaubos nani sa Sangguniang Panlungsod sa third and final reading,” padayag ni Tumulak.
Ang Department of Engineering and Public Works (DEPW) maoy gitahasan ni Mayor Edgardo Labella sa pagprepara sa tulo ka ektarya nga pampublikong sam-ang sa Barangay Sapangdaku human sila gitugotan ni Secretary Roy Cimatu sa Department of Environment and Natural Resources (DENR).
Sukad sa nalalabay nga duha ka semana, ang kaso sa Covid-19 sa dakbayan nag-anam na hinuon og kunhod ingon man ang fatality rate. Apan si Tumulak nihulagway nga labing maayo aduna gihapoy sementeryo ang dakbayan nga pagadumalahon sa Siyudad.
“Wa pa man ta mahibawo kon kanus-a mahuman ang Covid. So mas maayo nga preparado na ang Siyudad kay dili ta gusto nga masubli ang nahitabo niadtong unang semana sa Hunyo nga daghan kaayong patay nga lawas nga wala nalubong (dayon),” matod ni Tumulak. / PAC