Tinuod diay nga makaingon sa kagubot ug mosangko pa sa pinatyanay ang libak.
Mao ni ang nahitabo sa usa ka mag-uuma nga giluba sa pag-umangkon atol sa ilang karambola niadtong Huwebes sa alas 6 sa gabii sa Sitio Tagbo-ag Tubig, Barangay Tagjaguimit, Dakbayan sa Naga.
Si Antulio Requinto, 50, ulitawo, mag-uuma, dead-on-arrival (DOA) sa tambalanan human nakaangkon og duha ka mga samad dinunggaban sa likod nga bahin sa iyang lawas human dunggaba ni Jessie Requinto, 19, ulitawo, iyang pag-umangkon.
Samtang kritikal sa tambalanan si Romy Requinto, 38, kinsa nakaangkog samad sa tuong dughan kay gidunggab ni Antulio.
Si Romy naa sa Vicente Sotto Memorial Medical Center (VSMMC) ug gioperahan.
Si Police Staff Sergeant Jake Catane, imbestigador sa Naga Police Station nga nahinabi sa Superbalita Cebu, nagkanayon nga hubog si Antulio, nagmaoy.
KARAMBOLA
Iyang gikaaway si Jerson Padillo, umagad sa iyang ig-agaw nga si Romy.
Si Jerson, uban sa ilang mga kabanay ug silingan, nag-estambay gawas sa balay ni Romy.
Samtang nag-estorya sila sa gawas, kalit nga nibutho si Antulio nga hubog nangasaba, gitulisok si Jerson. Wa siya makauyon sa giingong nadungog nga estorya batok kaniya gikan kang Jerson. / GPL