Saad sa kagamhanan sa dakbayan sa Mandaue nga sa di pa matapos ang Agusto, moabli na ang duha ka bag-ong mga isolation center sa dakbayan.
Sa miaging mga adlaw, mianunsyo ang Regional Inter-Agency Task Force (RIATF) nga gilugwayan nila ang paggamit sa mga pampublikong tunghaan isip isolation centers kutob sa Agusto 15, 2020.
Sa news briefing ni Secretary Martin Andanar, sa Presidential Communications Operations Office, uban ni Mandaue City Mayor Jonas Cortes, gibutyag nga ang Norkis Park ug Cebu North Bus Terminal himoon isip dugang isolation centers sa Dakbayan. Sigon ni Cortes nga 50 ngadto sa 300 ka mga pasyente ang mamahimong ma-admit sa kada pasilidad.
Ang bag-ong isolation facilities butangan og libre nga WiFi aron di maburyong ang mga pasyente. Aduna sab kini CCTV cameras aron mas dali ang pag-monitor sa mga doktor sa mga pasyente ug aron maminusan ang pisikal nga pag-atubang sa mga medical worker ug pasyente.
Gawas niini, butangan sab kini og “panic button” sa kwarto sa pasyente aron kon adunay mga emergency sulod sa kwarto sa pasyente, ma-alarmahan dayon ang mga nurse ug doctor.
Ang ammenities di lang alang sa isolation center sa Norkis Park ug CNBT, anaa sab kini sa mga eskwelahan nga gihimong isolation center.
Sa pakighinabi sa Superbalita Cebu kang Atty. John Eddu Ibañez, executive secretary ni Cortes, siya niingon nga mihangyo ang dakbayan sa Mandaue sa Department of Public Works and Highways (DPWH) nga humanon ang duha ka pasilidad karong buwana.
Apan dugang niya nga gi-priority una nila ang Cebu North Bus Terminal tungod kay maoy butangan sa mga pasyente nga adunay mild ngadto sa moderate nga simtomas.
Ang ibutang nga mga pasyente sa Norkis Park kadtong way gipamati nga simtomas.
Sa di pa mahuman ang duha ka mga pasilidad, mogamit una ang dakbayan sa upat ka mga tunghaan isip isolation center.
Ang maong mga tunghaan, alang sa central cluster, mao ang Mandaue City Central School, Opao Elementary School.
Alang sa north cluster mao ang Paknaan Elementary School ug sa south anaa lang sa Subangdaku Elementary School o sa Cabancalan Elementary School.
Ang klase sa publikong mga tunghaan gitakda nga mobukas karong Agusto 24, 2020,
Hinuon, way gitugot nga face-to-face ni Presidente Rodrigo Duterte sa bisan asang dapit sa nasod hangtod nga ang mga magtutudlo ug tinun-an mabakunahan batok sa coronavirus disease (Covid-19). / KFD