Sa Lunes, Agusto 10, pabalikon na ang mga empleyado nga taga Probinsya sa Sugbo sa mga trabahoan niini sa Dakbayan sa Sugbo.
Tuyo niini aron makabangon ang mga Sugboanon sa krisis bunga sa coronavirus disease (Covid-19).
Apan una makabalik, may tahas nga gihatag ang Kagamhanan sa Lalawigan sa Sugbo.
Aron magiyahan, usa ka kamandoan ang giluwatan ni Cebu Governor Gwendolyn Garcia sa Agusto 6, nga mao ang Executive Order (EO) No. 20-C nga naglatid sa mga lagda nga subayon sa mga empleyado.
UNSAY BUHATON
Gitahasan ang tanan nga mga empleyado lukop probinsya sa Sugbo sa pag-register sa WeTrace.ph aron mas mahimong sayon ang pag contact trace.
Kini subay sa section one sa kamandoan nga “all persons within the province of Cebu are required to download the WeTrace App on their mobile phones in order to provide local government officials with an accurate system of tracing and monitoring...”
Mao kini ang ipakita sa matag trabahante sa kapulisan sa checkpoint.
Ang mga empleyado sa lalawigan sa Sugbo nga nagpuyo sa lugar nga ubos sa modified general community quarantine (MGCQ) ug general community quarantine (GCQ) kinahanglan nga mopakita og work travel pass (WTP) pinaagi sa mga mobile phone niini.
Apan aron mamenosan ang pagkatap sa kagaw, giabisohan ang mga empleyado nga nagpuyo sa MGCQ zones nga temporaryong mopasilong na sa syudad sa Sugbo.
Alang sa mga nagpuyo sa GCQ zones sama sa dakbayan sa Talisay, lungsod sa Minglanilla ug Consolacion, gikinahanglan usab nga mosubay sa maong lagda human niuyon ang kadagkoan sa maong mga lugar alang sa mas sayon nga contact tracing.
Aron mahatagan og workers pass, kinahanglan nga mosumiter sa workers identification (ID) card, workers certificate, ID picture ug medical certificate sa lokal nga kagamhanan.
Ang pass nga ihatag nagtugot sa mga empleyado nga makaagi sa mga agianan sa probinsya ug siyudad apan sa kondisyon nga point-to-point lang ang rota.
Buot pasabot nga ang tanan nga mga empleyado di pwede nga makasuroysuroy, ilabi kon mahuman sa trabaho.
Tungod kay kinahanglan ang ruta niini, gikan sa panimalay diretso sa trabaho ug vice versa.
Sa paggamit sa WeTrace app, gikinahanglan nga mag-on ang bluetooth ug location sa cellphone aron mas sayon ang pagsusi sa LGU sa lakaw sa empleyado.
Kon gani pagngon, moresulta kini sa pagkawalay bili ug walay bisa sa WTP.
Mopahigayon usab og imbestigasyon ang LGU sa maong empleyado. Gilaoman sa Probinsya sa Sugbo nga sa maong paagi, mapugngan ang pagkatap sa kagaw sa coronavirus disease (Covid-19). /