Nihangyo si Mayor Edgardo Labella ngadto kang Secretary Roy Cimatu Task Force Covid Cebu overseer, nga matugotan ang mga simbahan nga makapasud og mga manimbahay nga 10 porsiyento sa kapasidad niini, ilabi na sa Dominggo.
Ang mayor nibutyag usab nga niapilar siya sa Regional Inter Agency Task Force (RIATF) nga tugtan ang Archdiocese sa Sugbo nga makapasulod og 10 porsiyento inay 10 ra sa ilang mga parokyano ang patambungon sa misa sanglit ang Cebu City gipaubos na sa general community quarantine (GCQ).
“Under the omnibus guidelines, 10 ra gihapon. I made a representation nga i-allow ang 10 percent capacity of their churches to Secretary Roy Cimatu and the Regional IATF,” padayag ni Labella.
Siya nitug-an sa Superbalita Cebu nga bisan kon adunay panagbuwag sa simbahan ug estado, iyang gihimo ang paghangyo gumikan usab sa panawagan sa mga Sugbuanon ug nihangyo kaniya nga dugangan ang 10 ka parishioner para sila makaapil sa pagsimba.
Si Labella niingon nga naghuwat pa siya sa tubag ni Cimatu o sa RAITF para mahatagan na og giya ang mga pari ug katawhan.
Malaumon ang mayor nga mahatagan kini og positibo nga tubag sanglit ang IATF nitugot nga moabli ang mall diin adunay mga tawo nga nidagsa.
“If we allow the number of people to enter the malls, then there will be compelling reasons also to allow the people to go into the church as long as the minimum health protocol will be implemented,” dugang ni Labella. / PAC