DUHA ka mga locally stranded individuals (LSIs) ang mga bag-ong kumpirmadong kaso sa coronavirus disease (Covid-19) sa Cagayan de Oro human sila nagpositibo sa Sars-CoV-2 Agosto 7, 2020.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 177.
Matud ni City Health Office Epidemiologist Dr. Joselito Retuya, ang mga bag-ong kaso sa Covid-19 karon asymptomatic ug wala'y comorbidity. Nagpabilin sila sa Temporary Treatment and Monitoring Facility.
Ang ika-176 nga kaso usa ka 23-anyos nga lalaki nga LSI gikan sa Dasmariñas, Cavite ug residente sa Barangay Carmen. Miabot siya sa Cagayan de Oro Hulyo 30 pinaagi sa eroplano ug gi-swab Agosto 6. Ang resulta migawas nga positibo Agosto 7.
Matud ni Retuya nga naka-identify sila og pito ka mga close contacts sa lalaki, ang uban naa na sa city isolation unit.
Dugang pa niya nga ang duha sa close contacts sa 23-anyos nga lalaki mao ang ika-172 (29-anyos nga lalaki nga LSI gikan sa Dasmariñas, Cavite ug residente sa Barangay Agusan) ug ika-173 (30-anyos nga lalaki nga LSI gikan sa Dasmariñas, Cavite ug residente sa Barangay Tablon) nga mga kaso.
Ang ika-177 nga kaso usa ka 37-anyos nga lalaki nga LSI gikan sa Tagbilaran, Bohol ug residente sa Barangay Gusa. Miabot siya sa Cagayan de Oro pinaagi sa pagbiyahe sa dagat Agosto 1.
Ang lalaki gi-swab Agosto 6 ug ang resulta migawas nga positibo Agosto 7.
Nakatala usab ang City Health Office og duha ka bag-ong mga pasyente nga Covid-positibo nga gi-tag karon nga "recovered" human ang resulta sa ilang repeat swab migawas nga negatibo Agosto 7.
Naka-recover ang usa ka 51-anyos nga babaye nga LSI gikan sa Manila ug residente sa Barangay Macabalan; ug usa ka 22-anyos nga lalake nga returning overseas Filipino worker (ROF) ug residente sa Barangay Balulang.
Sa pagkakaron, ang Cagayan de Oro nakatala og 55 ka mga active cases, diin lima niini ang mga outpatients ug 50 ang mga ROFs/LSIs.