PAMPANGA

Garcia: Kasalpantayanan at ding Pamitalastasan Panlipunan (Faith and Socia Media)

Kapisik

KATUNGKULAN da ring manalastas panglipunan ing itas da la panimanman ding memalen.

Nung balang metung atin yang sasabyan bage makayaliwa, mangabaldugan a kaylangan kung gawang paralan bang abau ku ing katutwan.

Kapamilatan ning pamanapag karing panamdam ding tau, ing pamitalastas a panglipunan at ding tau keng patalastas ayayampat da la isip at apapagsamantalanan da la.

Ing lilingunan nang diling binit ning pamitalastas panglipunan keraklan king balitang ning panga-ulimo. Tuturing da la mu ding likas dang dapat ding ulimo “pamakipangalunya, pamamangan, pamanudtud, pamakilaban, kasikampwan at takut.

Ing taung dayukduk na king tula da ring panamdam buri da mandatila la

king maling kapanwalan bangating upayang mibalaus ing panga-panginwan da king labwad.

Kabud migsalita ka dikil king panga-diwang kaladwa, ing panga-talasuyu ning Dyos, isip na, Manaya ka, nu mu ku darala.Alang bisang maging talasuyu.

Buri ning balang metung maging ginu, magpakasasa, panginwan.

Alang bisang makarandam dikil king Kakataskatasan uling marirya la Kaya.

~Talaturu ning Mabilug a Yatu,

Piling Sunis ibat king“Ninung Mamampat king Isip Mu?

***

Karing ababasa, darandaman ta mu ayayalben kareng social media ngening panaun a kasalungsungan dakal tamu dapat iyugse kesa kareng dapat pulutan at tangkapan. Miyayaliwa ing laman da reti dapot keraklan para mu keng panglabwad a belwan at ing makasaup mu keng ikatula ning tau at ditak-a-ditak mu ing bang misaplala ing pang-kaladwa nang kapakanan.

Dalit, tigtigan, terakan, balita, sala-saita, indre-indredus, pamanuru at pamanigaral at atin mu namang mapilang mayap a aral “deti alus deng akit kareng socia media at websites keng internet. Makanyan man, ati na alus keng tau ing kalayan bang pumili keng nung sanu at nanu ing alben na kareting makalatag a miyayaliwang kalamnan ding social media.

Dakal ing alang kamula-mula o king malagwang salita “basura, subali pa keng manawang. Dapot atin ping kasebyan a deng babi matula lang maglublub keng dinat. Karin la manikwang bala da ligaya mengari karing tau mu naman a manikwang bala da ligaya mu naman “dapot pangsaguli mung tula at alang ibye pakinabang king kelambatan nung e lakwas pangasaldak king mengaring panagpakat ning bakal batubalani ning labwad a pangsaguli at kisnang kasakitan at dusa.

Alang marok keng dagdag belwan kabud magamit iti bang misaplala ya bye pangdiwa ing tau at aliwa itang murung ya at e na sumulung nung e mipalulung king e makakayap kaya. Nung pansingan tamu pati ding alagad ning kasalpantayanan gagamitan da na ing social media bang magmisa at manaral. Dakal na lang pari, pastor at aliwa pang talapanaral parati na lang mayayakit kareng social media at adarake da ing karelang belwan dikil keng karelang belwan king karelang kasalpantayanan.

Metung a apapansingan ku kareng tau “nanu la man kasalpantayanan “asno kaburi kareng awsan dang “memes†at pane da lang darake deti. Ala namang marok king pamangawa at pamidake kareng “memes†oneng uyta mu pin kesa kareng sunis kareng Banal a Kasulatan–lakwas da la pang gagamitan at padala deng memes a ninu-ninu mu ing ginawa at nanu-nanu mu ing laman da reti.

Balamu lakwas lang maulaga deng memes kesa kareng sunis a meyangu kareng pangaral a tiru ning Ginu at ding kampung na kekatamu kapamilatan ding aklat o Banal a Kasulatan. Sana agyang mapilan mung sunis ibat karing bilungan ding Banal a Kasuatan ing gawan at idake tamu kesa kareng meme ne, abe.

***

Dake Talabaldugan:

lubid (palagyu) pisi, tali, panabtas o panali a gawa keng abaka o pastic keng kasalungsungan. English - rope, cord, cable, strabnd, string, hawser, line. Alimbawa king pamangamit: na agyung itali ning nanu mang lubid agyang nanu ya pa kakaba at katibe ing kalayan da ring memalen.

lublób/lublúb (palagyu) gumuk,babad o magbabad king danum o laput. English - wallowing in mud or mire; being immersed in liquid for a long time. Alimbawa king pamangamit: Lublub na la keng kakalulwan deng dakal a memalen at lalu la pang mibakutkut keng dagdag a kasakitan ngening mika-sakit a makayawa.

lublub (palagyu) kulung a mula, bakuran. English - enclosed space. Alimbawa king pamangamit: Mekalwal la mu ri keng lublub deng asna karakal a itik uling agyang bagya mu makasulapo la iya alagpuusan de katas ing bakud.

lubós/lubús (panguri) puspus, ganap, sakdal. English - complete, completely; absolute, absolutely; utter, total, thorough, outright. Alimbawa king pamangamit: Lubus a kapanaligan ing pigkalub na keka ning metung a taung migpautang keka iya sana suklyan mu namang lubus a katapatan.

lubwagan (palagyu) matwa o lumang gubat o kasukalan, basal a gabun. English - virgin land, primitive forest. Alimbawa king pamangamit: Ing lalawigan tamung Kapampangan sadya yang lubwagan a kisnang gintu at balituk bayu la pa ditang deng dayu a mengisan at mignapap kareng likas a pibandyan tamu.

***

KAPABALWAN KAPAMPANGAN

Milipat ya ing aldo palugit inya malyari ka pang tagal, abe.

Pamagsane Pamanyulat king Kapampangan

Aldo - Agostu 24-29, 2020

Oras - Agpang king kegiwan tumagun

Kayabe - 15 Pilinang Talasulat karing bisang tumagun atin metanggap a makasulat na

Pipagmasusyan - Uling e da payntulutan ing arap-arapang pamipulung ing pamagsane marapat online

(kapamilatan ning Google Meet)

Panyulat a idwang - agyang 5 mung kawatasan (poems)

o 1 makuyad a salese (short stories) o 2 sanese (essays)

Aldo Palugit - Agostu 12, 2020

Malapit na, abe.

***

PIGAMPA: Ing Kapisik manalig yang misubling pasibayu ing lagablab ning legwan ning Kapampangan kapamilatan ning pamipasigla king keyang Kalinangan—ding keyang dalit, kawatasan, amlat at miyayaliwang kapaglalangan.

PARASAN: Pagnasan na niting ing paralan ning panyulat at sablang dake ning Kalinangan tamu a telukyan ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan.

Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph