ALEX Gonzaga ug Xian Lim na sab ang magpares karon sa online streaming service pinaagi sa pelikulang “Love The Way U Lie.”
Kining maong pelikula hatod nato sa Viva films para unta sa unang Metro Manila Summer Film Festival nga wala madayon niadtong Abril tungod sa pandemia.
Karon adunay venue na ang maong pelikula nilang Alex ug Xian kay ato na unya kining makita sa Netflix.
Nunot usab siguro kini sa nahitabong ka-init nga pagdawat sa salida nilang Paolo Contis ug Alessandra de Rossi nga “Through Night and Day.”
Unya karon nga may gipahibalo na mang mga pelikula para sa umaabot Metro Manila Film Festival (MMFF) 2020, mipahibalo usab ang Viva films production nga ang ilang pelikulang “Love The Way U Lie,” makita na usab karong buwana sa Netflix.
Mahimo kahang susama ka malampuson sa “Through Night and Day” nilang Alessandra ug Paolo ang movie nilang Alex ug Xian, atangi, Ay’g Saba!
* * *
Kay nahisgutan naman nato ang MMFF nga may nakuha na silang pelikula para karong Pasko, sama kaha ka mabulokon ug malampuson ang mga pelikula unya nga ipasundayag atol sa new normal nga panahon?
Wala pa gani magsugod ang festival may mga isyu ug intriga na nga nahitabo una niini ang mga patutsadahan sa usa ka direktor kon nganong may Vice Ganda nga pelikula na usab nga official entry.
Kon si Vice ang pasultion, ang iyang gi-problema karon mao ang kon unsaon nila pag-shooting ang tibuok movie sa panahon ining pandemia nga nahitabo.
May umaabot nga pelikula usab sa MMFF si Joshua Garcia ug laing pelikula usab sa managsuong Alex ug Toni Gonzaga.
May mga paabuton pa kitang mga entry, huwaton lang nato nga mohatag na sila sa tanang official entry sa MMFF.
May mga isyu pa ra ba usab kini silang gi-atubang karon nga giilisan na si Liza Diño kang Laurice Guillen kon wa ko masayop nga maoy mangilog sa festival, Ay’g Saba!
* * *
Sugo kaha sa script o tungod sa pandemia mao nga gipatay na ang mga karakter nilang Christopher de Leon ug Ariel Rivera sa ilang mga teleserye karon sa Kapamilya channel?
Ang main character nga si Adam Wong - Christopher de Leon sa “Love Thy Woman,” patay na sa bag-ong episode niini.
Mao usab ang papel ni Ariel Rivera sa “A Soldier’s Heart,” diin gipatay na usab sa maong teleserye.
Human nila napakita sa pila ka episode, karon sa bag-ong mga episode wala na sila, tungod kaha kay wala na kini sila maapil sa lock-taping nila nga gipahigayon?
Kon unsa nay dangatan sa ilang sugilanon, inyo na lang kining nuntan sa maong mga teleserye, Ay’g Saba!