Nalzaro: Naunay sa tari ang Lebanon

Nalzaro: Naunay sa tari ang Lebanon

WALAY angaykabalak-an ang nahitabong pag-ulbo sa Beirut, Lebanon niadtong miaging Martes nga mipatay og 135 ka mga tawo apil na ang upat ka mga Overseas Filipino Workers (OFW) ug mi-angol og 5,000. Daghang mga edepisyo duol sa explosion site ang nangabungkag usab. Nganong mi-ingon ko nga walay kabalak-an sa maong pag-ulbo? Gumikan kay dili kini binuhatan sa mga terrorista o extremista sa maong nasud. Aksidente lang gyud ang maong hitabo. Kon sa mga sugarol pa ‘na-unay sa tari ang Lebanon’.

Ang Lebanon usa kini ka bukid nga nasud sama sa ubang mga nasud sa Middle East. Apan aduna say dagat. Gitaliwad-an kini sa Israel ug Syria nga gubot nga mga nasud. Aduna kini population nga 6.1 million ug 1.5 million niini refugees o mga tawo nga namakwit didto.

Nganong na-unay man sa tari? Gumikan kay ang pag-ulbo, aksidente lang gyud. Adunay naka-stockpile nga mga sinakong ammonium nitrate sa usa ka warehouse sa container yard sa pantalan sa Beirut. Dugay na nga naka-stockpile ang maong mga chemical ug mi-init na gyud siguro mao nga mi-ulbo.

Kining ammonium nitrate usa kini ka matang sa abuno apan maoy gigamit nga ingredients sa paghimo og bomba. Explosives kini. Dinhi sa ato, regulated chemical kini. Dili ka basta-basta nga makapalit niini. Nagkinahanglan ka og permit gikan sa Philippine National Police (PNP) explosives unit kay mao kini ang gigamit sa mga terorista sa paghimo og bomba labi pa kanang mga improvised explosive. Ang PNP maoy mo-supervise sa pagpalit ug pag-release ning maong chemical.

Sa nahitabo sa Beirut, klaro ug tataw kaayo nga nagpabaya lang ang mga awtoridad. Wala ma-inspeksiyon ang ilang mga warehouses. Napabayaan o napasagdan maoy hinungdan nga niulbo ug nakakutlo hinuon og mga inosenteng kinabuhi.

Mao nga insakto ang sugyot ni Cebu third district Congressman John Pablo Garcia nga gikinahanglan nga mohimo og lakang ang atong mga awtoridad, ang Bureau of Customs ug PNP aron mopahigayon og mga inspection sa mga warehouse dinhi sa ato aron sutaon kon wala bay nag-stock og ammonium nitrates. Insakto ning maong sugyot o lakang kay basin og naay nag-stock diha. Ma-unay unya ta sa tari. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph