Mga bodega nga hayan may explosives susihon

POLICE Regional Office 7 mohimog inspection sa mga warehouse nga gihimong explosives storage aron malikayan ang nahitabong pag-ulbo sama sa Beirut, ulohang siyudad sa Lebanon nga mikalas og gatusan ka kinabuhi.

Una nang miawhag ang kongresista sa ikatulong distrito sa lalawigan sa Sugbo, Pablo John Garcia, sa mga sakop sa Bureau of Customs ug ubang otoridad sa pag susi sa tanang warehouse nga adunay gitago nga eksplusibo.

Kini nunot sa nahitabong pag ulbo sa gibana-bana dul-an sa 3,000 ka toneladang ammonium nitrate sa usa ka warehouse sa Beirut.

Si Police Brigadier General Albert Ignatius Ferro, hepe sa PRO 7, sa iyang bahin, nimando sa Regional Civil Security Group sa pagsusi sa mga warehouse kon nasunod ba ang safety protocol sa Philippine National Police.

“Ang akoa lang is the storage of explosives separating the initiator and the explosives because if they’re in one storage, delikado sila,” pagpasabot ni Ferro.

Makig-alayon usab siya sa Philippine Coast Guard alang sa pagsubay sa gipang transport nga mga ammonium nitrate nga gigamit sa mining operation.

Dugang sa heneral nga kon di kini mapahimutang sa husto nga butanganan, mahimong mobuto kini ug mabutang na hinuon sa peligro ang kinabuhi sa mga tawo nga naa sa duol niini.

“Basically, ang ammonium nitrate is a fertilizer-based chemical and usually it is used for agricultural. And sometimes ammonium nitrate could be converted to nitroglycerine and it will become a dynamite and used for mining and blasting activities,” ugang ni Ferro.

Adunay taas nga kasinatian ang heneral tungod kay nahimo usab siya nga hepe sa Explosives Ordnance Disposal sa PNP. (AYB)

Related Stories

No stories found.
SunStar Publishing Inc.
www.sunstar.com.ph