Cortes: Mandaue di kaayo apektado sa quarantine

GAMAY ra og epekto ang community quarantine sa ekonomiya sa dakbayan sa Mandaue kay kapin sa 50 porsyento sa mga miyembro sa Mandaue City Chamber of Commerce Inc. (MCCI) padayong nag-abli.

Gani, giila sab ang dakbayan sa Mandaue isip industrial hub ug daghang mga establisemento ang essential.

Adunay 457 ka mga myembro sa MCCI, diin 242 ang mga essential nga establisemento, 212 ang temporaryo nga sirado ug tulo pa ang sirado.

Gipahibawo kini ni Mandaue City Mayor Jonas Cortes sa news briefing kauban si Secretary Martin Andanar sa Presidential Communications Operations Office (PCOO).

Gipasabot ni Cortes nga adunay pagtinabangay sa tri-cities, Cebu City isip komersyal nga hub, ug ang Lapu Lapu City isip transport hub, nga naghiusa alang sa Project Balik Buhay (PBB) nga adunay katuyoan sa paghinay hinay og bukas sa mga kalihokan sa ekonomiya.

Dugang pa ni Cortes nga gikonsiderar sa tri-cities nga ang pag-anam anam nila og abli nagbase sa usa ka scientific nga ebidensya. Giangkon ni Cortes nga ang pagkumbati sa coronavirus disease (Covid-19) nakaapekto sa ekonomiya sa Mandaue, apan dili kaayo.

“The good thing is we are trying to recover and we have mitigating measures by the ease of doing business,” sigon ni Cortes.

Dugang niya nga ang mga negosyante sa Mandaue makakuha dayon og special permit to operate pinaagi lang sa online ug dili na kinahanglan nga moadto pa sa Business Permit and Licensing Office (BPLO).

Atol sa interbyu ni Andanar, nangutana siya ni Cortes kon aduna bay gitanyag nga mga programa ang Dakbayan sa Mandaue alang sa mga negosyante nga gusto nang moabli, apan wa nay igong pundo.

Mitubag si Cortes nga nakig-alayon na sila sa MCCI kabahin sa mga ayuda nga mamahimo nga itanyag ngadto sa mga negosyante. (KFD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph