Barangay kapitan nag-mahjong, dakpan

NAAKTUHAN. Mao kini ang lima ka mga tawo nga naglakip kang Barangay Kapitan Joel Ramos Saragena sa Langtad, Argao nga naaktuhang nagsugal og mahjong. (Tampo sa Argao Police Station)
NAAKTUHAN. Mao kini ang lima ka mga tawo nga naglakip kang Barangay Kapitan Joel Ramos Saragena sa Langtad, Argao nga naaktuhang nagsugal og mahjong. (Tampo sa Argao Police Station)

KAPITAN sa Barangay Langtad, lungsod sa Argao, uban sa laing tulo ka mga tawo, nasikop sa kapulisan samtang nag-mahjong sa Barangay Poblacion sa maong lungsod.

Ang nadakpan mao si Kapitan Joel Ramos Saragena, 51. Uban kaniya sila si Cipriano Remoroza Lanutan, 69, taga Barangay Canbanua; James Carlo Zamora De Los Reyes, 34, taga Jampang ug Richardson Panebio Sarsaba, 32, taga Lamacan, lungsod sa Argao.

Nasakmit sa mga pulis ang usa ka set sa mahjong tiles, P90 nga sugal ug duha ka dice.

Matod ni Police Captain Elston Dabon lll nga nakadawat na usab silag tawag sa telepono nga adunay nag-mahjong sa usa kiosko sa Barangay Poblacion nga gidumala ni Lanutan.

Dali nga niresponde ang mga pulis ug naabtan si Saragena nga misalat sa tiles sa mahjong.

Wa na makalihok ang kapitan ug lain niyang mga kauban tungod kay naaktohan kini sa iyang pag duwa.

“Si Cipriano ang nag facilitate sa duwa. Nahitabo lang nga niduwa sad si Kap. Naa sila sa kiosko gawas sa balay nga open kaayo ba nga makita sa daghang mga tawo nga mangagi,” matod ni Dabon.

Giklaro ni Dabon nga ang tanang matang sa sugal mabaraha man o unsa, illegal kini.

Labi na karon nga naa pa sa community quarantine ang tibuok probinsya sa Sugbo diin gidili pa ang mga panagtapok.

Awhag sa kapulisan ngadto sa publiko ilabi na sa elected officials nga tumanon ang mando sa Kagamhanan sa lalawigan sa Sugbo.

Kalapasan sa Presidential Decress (PD) 1602 kun illegal gambling ang atubangong kaso sa mga suspek.

Posibling laing kasong administratiba ang atubangon ni Saragena tungod sa iyang pagka public official.

Una nang mibahad si Gobernador Gwendolyn Garcia nga iyang pasakaan og kaso ang mga kapitan ug ubang elected officials nga madakpan sa illegal nga pasugalan ning panahon sa pandemic.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph